Одлука о орґанизациї и роботи Служби Скупштини Автономней Покраїни Войводини

I ОСНОВНИ ОДРЕДБИ

Член 1.

Служба Скупштини Автономней Покраїни Войводини (у дальшим тексту: Служба Скупштини) окончує фахово, административно-технїчни и други роботи за потреби Скупштини Автономней Покраїни Войводини (у дальшим тексту: Скупштина) и єй роботних целох, посланїкох, предсидателя и подпредсидательох Скупштини, посланїцких ґрупох у Скупштини, як и други роботи у складзе зоз Дїловнїком о роботи Скупштини, другима актами Скупштини и єй роботних целох.

Служба Скупштини окончує роботи фахово, квалитетно, ефикасно, економично, нєпристрасно и политично нєутрално.

Член 2.

Зоз тоту одлуку ше ушорює орґанизацию и роботу Служби Скупштини, утвердзує орґанизацийни єдинки у рамикох хторих ше ґрупує истофайтови або зродни и медзисобно повязани роботи, одредзує и розкласує положеня и роботни места занятих у Служби Скупштини и ушорює други питаня хтори значни за роботу Служби Скупштини.

У Служби Скупштини ше формує Кабинет предсидателя Скупштини (у дальшим тексту: Кабинет), як окремну орґанизацийну єдинку.

II РУКОВОДЗЕНЄ ЗОЗ СЛУЖБУ

Ґенерални секретар

Член 3.

Зоз Службу Скупштини руководзи ґенерални секретар Скупштини (у дальшим тексту: ґенерални секретар).

Ґенерални секретар орґанизує и обезпечує єдинствену роботу Служби Скупштини и окончує други роботи у складзе з Дїловнїком о роботи, другима актами Скупштини и тоту одлуку.

Член 4.

Ґенерални секретар приноши Правилнїк о нукашнєй орґанизациї и систематизациї роботних местох у Служби Скупштини (у дальшим тексту: Правилнїк о систематизациї), зоз согласносцу одбору цо компетентни за административни питаня.

Член 5.

У поглядзе руководзеня з роботу Служби Скупштини, снованя и преставаня роботного одношеня занятих, витворйованя правох, длужносцох и одвичательносцох занятих у Служби, як и хаснованя и розполаганя зоз средствами за роботу Скупштини и Служби Скупштини, ґенерални секретар ма права и длужносци старшини хтори руководзи з орґаном покраїнскей управи.

Заменїк ґенералного секретара

Член 6.

Ґенерални секретар ма заменїка.

Заменїк ґенералного секретара окончує роботи хтори му звери ґенерални секретар, помага ґенералному секретарови у роботи и заменює го у случаю його одсутносци або зопартосци же би окончовал функцию.

Заменїк ґенералного секретара ма права и длужносци старшини хтори руководзи з орґаном покраїнскей управи.

III ШЕФ КАБИНЕТУ И СОВИТНЇК ПРЕДСИДАТЕЛЯ СКУПШТИНИ

Член 7.

Кабинет творя шеф Кабинету и совитнїк предсидателя Скупштини, як функционере.

Шеф Кабинету за свою роботу и роботу Кабинету одвитує предсидательови и ґенералному секретарови.

Шефа Кабинету и совитнїкох предсидателя Скупштини, на предкладанє предсидателя Скупштини, поставя одбор цо компетентни за административни питаня найдлужей на час док тирва длужносц предсидателя Скупштини.

На основи акта о поставеню, шеф Кабинету и совитнїки предсидателя витворюю права зоз роботного одношеня, у складзе зоз законом.

З дньом поставеня, шефови Кабинету и совитнїком предсидателя мирую права и обовязки зоз роботного одношеня, у складзе зоз законом.

IV РОБОТНИ МЕСТА И ЗАНЯТИ У СЛУЖБИ СКУПШТИНИ

Член 8.

Заняти у Служби Скупштини то службенїки и намесценїки.

Службенїкох ше дзелї на службенїкох на положеню и вивершительох.

Член 9.

Положенє то:

- помоцнїк ґенералного секретара.

Особи зоз пасуса 1. того члена, по запровадзеним явним конкурсу, у складзе зоз законом и покраїнским предписаньом, поставя одбор цо компетентни за административни питаня, на пейц роки.

Член 10.

Роботни места вивершительох ше класує до званьох, у зависносци од зложеносци и одвичательносци роботох, потребних знаньох, способносцох и условийох за роботу, у складзе зоз законом и уредбу.

Роботни места намесценїкох ше класує до пейц файтох, у зависносци од зложеносци и одвичательносци роботох, потребних знаньох, способносцох и условийох за роботу, у складзе зоз законом и уредбу.

V ОРҐАНИЗАЦИЙНИ ЄДИНКИ СЛУЖБИ

Член 11.

Орґанизацийни єдинки Служби Скупштини ше формує як основни и узши нукашнї єдинки.

Основна нукашня єдинка то сектор, у хторим обєдинєни роботи хтори представяю окремну обласц роботи, односно медзисобно повязани роботи вецей узших нукашнїх єдинкох.

У Служби Скупштини ше орґанизує тоти сектори:

• Сектор за пририхтованє схадзкох Скупштини и роботних целох и медзиреґионалне сотруднїцтво;
• Сектор за людски ресурси, роботно-правни роботи и роботи писарнїци;
• Сектор за финансийни роботи, информацийни технолоґиї и одношеня з явносцу.

З роботу секторох руководзи помоцнїк ґенералного секретара Скупштини.

У Служби Скупштини ше орґанизує Ґенерални секретарият, як узшу нукашню єдинку звонка сектору.

Дїлокруг орґанизацийних єдинкох

Член 12.

У Секторе за пририхтованє схадзкох Скупштини, роботних целох и медзиреґионалне сотруднїцтво ше окончує фахово и административни роботи у вязи зоз пририхтованьом и отримованьом схадзкох Скупштини, роботних целох и посланїцких ґрупох и роботи витворйованя и унапредзеня медзиреґионалного сотруднїцтва и розвою културного и економского партнерства медзи реґионами, пририхтованя актох и реализованя активносцох з обласци медзиреґионалних одношеньох.

У Секторе за людски ресурси, роботно-правни роботи и роботи писарнїци ше окончує роботи управяня з людскима ресурсами и роботи у вази зоз роботно-правнима роботами, як и роботи писарнїци (приманє, експедиция пошти и архива).

У Секторе за финансийни роботи, информацийни технолоґиї и одношеня з явносцу ше окончує финансийни роботи, роботи з обласци явних набавкох и роботи з обласци информацийних технолоґийох, орґанизує ше конференциї за новинарох и наявох схадзкох Скупштини и єй роботних целох; пририхтує сообщеня за явносц, запровадзує и отримує контакти з медиями, провадзи и анализує домашнї и странски медиї; орґанизує и координує роботи виробку брошурох и публикацийох Скупштини; поставя сообщеня, информациї и обвисценя и дньово активносци о роботи Скупштини.

Член 13.

У Кабинету ше окончує фахово, административни и други роботи хтори значни за окончованє функциї предсидателя и подпредсидательох Скупштини.

Член 14.

У Ґенералним секретарияту ше формує Оддїл за общи и административни роботи и Протокол.

У Ґенералним секретарияту Скупштини ше окончує роботи виробку актох хтори приноши секретар Скупштини, роботи креированя стратеґийох розвою Скупштини и Служби Скупштини, моцнєня улоги Служби Скупштини у розвою парламенту, креированя и виробку специфичних мирох и акцийох за пошвидшанє процедурох роботи и роботних задаткох у Служби Скупштини, роботи прекладаня, орґанизованя и реализованя медзиреґионалних стретнуцох и путованьох предсидателя, подпредсидательох, покраїнских посланїкох и службених делеґацийох Скупштини у жеми и иножемстве; роботи кореспонденциї з дипломатичнима представителями и представителями медзинародних орґанизацийох; сотруднїцтво з протоколами републичних орґанох, другима републичнима и покраїнскима орґанами и службами, орґанами локалних самоуправох, подприємствами и другима орґанизациями и институциями, координованє з Министерством вонкашнїх дїлох и дипломатичнима конзуларнима представительствами.

Член 15.

Ґенерални секретар може, у случаю потреби, одредзиц же би роботи зоз дзепоєдних орґанизацийних єдинкох окончовали заняти и поставени особи хтори розпоредзени до других орґанизацийних єдинкох.

Роботни ґрупи

Член 16.

У складзе з потребами и вимаганями Скупштини и єй роботних целох, за окончованє дзепоєдних роботох мож формовац фахово роботни ґрупи.

Фахово роботни ґрупи формую, зоз составу Служби Скупштини, ґенерални секретар Скупштини и роботне цело за роботи зоз свойого дїлокругу.

До фахових роботних ґрупох мож одредзиц и фаховцох з орґанох покраїнскей управи и других орґанох и орґанизацийох и наукових роботнїкох, о чим одлучує ґенерални секретар Скупштини и предсидатель роботного цела у догварки зоз старшином орґана покраїнскей управи, односно другого орґана або орґанизациї.

Член 17.

Дїлокруг одбору цо компетентни за административни питаня у вязи з роботу Служби Скупштини

Одбор цо компетентни за административни питаня, у вязи з орґанизацию и роботу Служби Скупштини, окончує тоти роботи:

• дава согласносц на Правилнїк о систематизациї,
• утвердзує предкладаня за обезпеченє средствох у буджету Покраїни за роботу Скупштини и Служби Скупштини,
• приноши рочни финансийни план приходох и розходох Скупштини (як и други акти на основи Закона и одлуки),
• поставя и розришує шефа Кабинету и совитнїкох предсидателя Скупштини,
• поставя службенїкох на положеню по запровадзеним явним конкурсу,
• приноши ришеня о плацох ґенералного секретара и заменїка ґенералного секретара Скупштини и поставених особох у Служби Скупштини, у складзе зоз законом и покраїнску уредбу.

VI ПРЕХОДНИ И ЗАКОНЧУЮЦИ ОДРЕДБИ

Член 18.

Ґенерални секретар, на основи тей одлуки, принєше Правилнїк о нукашнєй орґанизациї и ситематизациї роботних местох у Служби Скупштини.

Член 19.

Шеф кабинету и совитнїки предсидателя Скупштини хтори поставени пред ступаньом на моц тей одлуки можу предлужиц з роботу по виходзенє часу на яки су поставени, а найдлужей док тирва мандат вибраней особи.

Член 20.

Зоз ступаньом на моц тей одлуки престава важиц Одлука о орґанизациї и роботи Служби Скупштини Автономней Покраїни Войводини («Службени новини АПВ», число 28/12).

Член 21.

Тота одлука ступа на моц по обявйованю у "Службених новинох Автономней Покраїни Войводини".