Нови Сад, 19. новембер – У Привредней комори Войводини нєшка отворени дзевяти Реґионални дїловни форум, хтори традицийно орґанизую Скупштина АП Войводини и Привредна комора Войводини у сотруднїцтве зоз Скупштину европских реґийох (АЕР) и покраїнскима институциями и фондами.
Бешедуюци на шветочним отвераню, предсидатель Скупштини АП Войводини др Балинт Югас визначел же дзевец роки континуитету потвердзує же тот Форум постал важне место стретаня привреднїкох, институцийох и реґионалних партнерох, зоз заєднїцким цильом моцнєня економского сотруднїцтва, повязованя привреди и отвераня нових дїловних можлївосцох.
«Привреда Войводини ма винїмково важну улогу у вкупней економиї Сербиї. Робна черанка АП Войводини прешлого року була коло 23 милиярди евра, а у авґусту того року Войводина мала найвекшу учасц медзи реґионами у вкупним вивозу Сербиї – 30 одсто. Тиж, у перших дзевец мешацох того року жеми Европскей униї творели 58 одсто вкупней робней черанки Сербиї», визначел предсидатель Югас и додал же тоти указателє бешедую кельо за нашу привреду важне повязованє зоз европскима реґионами и приступ новим тарґовищом.
Вон наглашел же улога институцийох же би творели условия за сотруднїцтво, будовали довириє и повязовали привреднїкох зоз потенциялнима партнерами, алє и же би отверали дзвери нових тарґовищох и оможлївйовали привреднїком свойо идеї претворели до конкретних дїловних резултатох.
«Тримам же ше права значносц того Форуму находзи праве медзи двома столїками – за єдним ше институциї догваряю о рамикох сотруднїцтва, а за другим привреднїки тоти догварки реализую до конкретних роботох, инвестицийох и нови роботни места», поручел Югас.
Предсидателька Покраїнскей влади Мая Ґойкович визначела же швидки технолоґийни пременки, нови ґеополитични обставини и поремеценя на шветових тарґовищох уплївую на дїлованє, а привреди зоз реґиону зоз заєднїцкима проєктами и наступом на иножемних тарґовищох годни лєгчейше одвитовац на тоти спокуси. Ґойковичова наведла же Покраїнска влада окремну увагу пошвецує малим и штреднїм подприємством, як и инвестицийом хтори приноша нови роботни места и сучасни технолоґиї и оможлївюю домашнїм компанийом уключиц ше до медзинародних ланцох добавячох.
Вона додала же циль же би инвеститоре хтори уж дїлую у Войводини преширя продукцийни капацитети, а же би домашнї компаниї унапредзели конкурентносц.
Предсидатель Привредней комори Войводини Владимир Ґак гварел же у рамикох Форуму заказани 310 дїловни сходи, а же прейґ платформи приявени 191 учашнїк зоз Сербиї, Мадярскей, Турскей, Билорусиї, Нємецкей и других жемох. Вон наведол же на Форуму присутни и делеґациї зоз Французкей, Греческей, Италиї, Сиверней Македониї, Турскей и Републики Сербскей. Ґак як найважнєйши теми о яких учашнїки у рамикох панелох буду бешедовац видвоєл нови правила европского тарґовища, желєну транзицию, повязованє зоз Пристанїщом Трст, заєднїцки бренд квалитету подунайского реґиону, як и розвой поднїмательства.
По шветочним отвераню, подписани и Меморандум о сотруднїцтве Привредней комори Войводини, Привредней комори Сиверней Македониї, Греческо-сербскей привредней комори и Пристанїща Трст.
Попри числених представнїкох привредних субєктох, на отвераню Реґионалного дїловного форуму бул и подпредсидатель Скупштини АП Войводини Борис Новакович и члени Покраїнскей влади.