Сента/Нови Сад, 8. октобер - Предсидатель Скупштини АП Войводини др Балинт Югас привитал нєшка у Сенти учашнїкох образовней вистави «SuliExpo», хтора того року позберала вецей як 1.250 школярох осмей класи и 28 викладачох - штреднїх школох и ґимназийох у хторих ше наставу отримує и на мадярским наставним язику.
Отвераюци тот традиционални саям образованя, Югас школяром поручел же одлука о виборе штреднєй школи важна, алє вона нє муши одредзиц їх животну драгу.
«Нєшка нє мушице одлучиц о цалим своїм живоце, треба лєм же бисце пренашли шлїдуюци добри крочай. Нє важне хтора школа найлєпша, алє хтора найлєпша за вас», поручел Югас.
Бешедуюци о будучносци младих, предсидатель Скупштини АПВ обрацел увагу и на швидки пременки хтори приноши швет роботи. Як наведол, по єдним медзинародним виглєдованю, 39 посто петнацрочни особи ище вше нє знаю з чим би ше жадали занїмац у будучносци, док проценьованя роботодавательох указую же ше до 2030. року пременя аж 39 посто основни схопносци потребни за роботу.
«Док ви глєдаце свою драгу, швет коло вас нє стої у месце. Прето важне же бисце здобули добре образованє, алє и способносц учиц ше, прилагодзовац ше и препознавац нови нагоди», поручел Югас.
Вон окреме бешедовал о тиме же можлївосц образованя на мацеринским язику представя значну часц образовней системи Войводини и єдну з вредносцох хтори треба зачувац за будуци ґенерациї.
«Наша вецейязичносц нє лєм часц прешлосци, алє жива вредносц нашого дружтва. Прето важне же би млади мали можлївосц школовац ше на своїм мацеринским язику, же би источасно учели и други язики и були порихтани за швет хтори ше нєпреривно меня», гварел Югас и визначел же очуванє образованя на мацеринским язику значи и очуванє язику, култури и идентитету єдней националней заєднїци.
«Наша обовязка же бизме младим обезпечели вибор. Же би мали можлївосц учиц ше на своїм мацеринским язику, же би здобули квалитетне знанє и после того сами виберали по хторей драги буду крачац», поручел Югас.
Дзень пред тим, традиционално отримана и манифестация «ЕduExpo», наменєна школяром закончуюцих класох штреднїх школох, на хторей представени високошколски установи на хторих ше наставу отримує на мадярским наставним язику. Учашнїкох привитали и предсидатель Националного совиту мадярскей Националней меншини Арпад Фремонд и предсидателька општини Сента Гайналка Бурань.