Нови Сад, 30. септембер – Предсидатель Скупштини АП Войводини др Балинт Югас виявел на шветочним отвераню Медзинародних саймох «ЛОРИСТ» же одвичательне ґаздованє з природнима ресурсами представя основу за розвой ловства, туризму и локалних заєднїцох, з источасним очуваньом природи.
«Добри ґазда ше нє препознава по тим кельо ма. Препознава ше по тим як ґаздує з тим цо ма. А у ловстве праве тото слово, ґаздованє, можебуц найлєпшe описує шицко о чим нєшка бешедуєме», гварел Югас. Вон визначел же тогорочни, 57. по шоре ЛОРИСТ, указує як би ше сучасне ловство требало розвивац, окреме видвоююци Першу реґионалну берзу ловного туризму и ловней дзивини, хтора повязує хасновательох ловискох, ловацки здруженя и привреду зоз Сербиї и реґиону.
«Тарґовище и защита природи у истей гали. То два боки озбильного ґаздованя», поручел Югас и здогаднул же ше ловиска у Войводини пресцераю на вецей як два милиони гектари, а 92 посто у компетенциї ловацких здруженьох. Югас визначел же тоти сайми превозишли статус реґионалних бо на тогорочней вистави єст вецей як 120 викладачох зоз Сербиї и иножемства, як и учашнїкох з числених африцких жемох. 
Предсидателька Покраїнскей влади Мая Ґойкович, хтора отворела саям, визначела же вецей як пол вика традициї потвердзує тирвацу вредносц тей манифестациї, хтора давно превозишла рамики класичного сайму лова и риболова и постала место стретнуца еколоґиї, защити природи, наутики, спорту, рекреациї и туризму.
Вона визначела же Войводина ма значнєйши потенцияли за розвой активного туризму и наведла же число туристох у АП Войводини звекшане за 14,2 посто у одношеню на исти период прешлого року.
Ґойкович додала же Покраїнска влада того року видвоєла 132 милиони динари за промоцию и розвой ловства и риболова на териториї Войводини з цильом потримовки ловацким здруженьом и унапредзеня инфраструктури.
На отвераню ЛОРИСТ - у, хтори облапя Саям лова и риболова и Саям еколоґиї, бешедовали городоначалнїк Нового Саду Жарко Мичин и ґенерални директор Новосадского сайму Слободан Цветкович, а присуствовал и подпредсидатель Скупштини АПВ Борис Новакович.
Медзинародни сайми «Лорист» буду тирвац од 30. септембра по 4. октобер, а позберали вецей як 120 викладачох з жеми и иножемства, як и учашнїкох з числених жемох Африки. Попри опреми за лов, риболов и найновших трендох у наутики и кампованю, тогорочна манифестация приноши винїмково богату провадзацу програму за шицки ґенерациї.