Апатин, 28. септембер – Предсидатель Скупштини АП Войводини др Балинт Югас и предсидателька Покраїнскей влади Мая Ґойкович присуствовали нєшка у Апатину на шветочним означованю 25 рокох защити Специялного резервату природи «Горнє Подунавє».
На шветочносци, хтору орґанизовало ЯП «Войводилєси» хторе ґаздує з тим подручом, предсидатель Югас визначел же защита Горнього Подунавя тирва вецей як 25 роки, з оглядом же моношторски лєси и бивалнїки билохвостового орла и чарней ґовллї защицени ище 1955. року.
«Природа ше нє чува од нєшка по ютре. Чува ше од ґенерациї по ґенерацию», поручел Югас.
Вон визначел же ше Горнє Подунавє пресцера на скоро 20.000 гектарох коло Дунаю, на подручу Зомбору и Апатину и представя єдно з найзначнєйших очуваних мочарних и лєсових подручох у Сербиї.
«Прето Скупштина АП Войводини прешлого року принєсла одлуку о виробку нового Просторного плану подруча окремней наменки Специялного резервату природи «Горнє Подунавє». Праве ше з такима одлуками одредзує дзе престава интерес нєшкайшей хвильки, а почина одвичательносц ґу будучносци», гварел Югас и наглашел же защита природи нє значи застановйованє розвою, алє то розвой хтори оможлївює же би природни вредносци остали зачувани и за будуци ґенерациї.
«Горнє Подунавє нє нашлїдство хторе треба потрошиц. То нашлїдство хторе треба зачувац и звекшац його вредносц за тих хтори приходза после нас», поручел Югас.
Предсидателька Покраїнскей влади Мая Ґойкович визначела же Покраїнска влада континуовано уклада до защити и унапредзеня природних доброх, з потримовку управячом защицених подручох, очуваньом биодиверзитету, ушореньом и ревитализацию природних бивалнїкох, як и з едукацию и дзвиганьом свидомосци о значносци защити природи.
«Горнє Подунавє у тим смислу окреме драгоцине. Тото подруче часц велькей природней системи Дунаю и єдного з найзначнєйших европских коридорох биодиверзитету», визначела Ґойкович.
Директор ЯП «Войводиналєси» Роланд Кокаи визначел же 25 роки защити 
Специялного резервату «Горнє Подунавє» вельки ювилей хтори окреме значни за Войводиналєси бо представя приклад велького укладаня и намаганя и самого подприємства, алє и локалних, покраїнских и републичних институцийох.
Од 2017. року «Горнє Подунавє» часц УНЕСКО резервату биосфери «Бачке Подунавє», а од 2021. року є уключене и до прейґгранїчного УНЕСКО резервату биосфери «Мура – Драва – Дунай», хтори повязує защицени подруча Сербиї, Грватскей, Мадярскей, Словениї и Австриї.