Нови Сад/Сента, 23. септембер – Предсидатель Скупштини АП Войводини др Балинт Югас присуствовал нєшка у Сенти на шветочним подписованю Спорозуменя о сотруднїцтве медзи Заводом за културу войводянских Мадярох и Етноґрафским музейом на отвореним «Сканзен» у Сентандреї.
Циль Спорозуменя то запровадзованє институционалного рамику за дальше моцнєне фахового сотруднїцтва медзи двома установами, як и стимулованє реализованя заєднїцких инициятивох у обласци защити културного нашлїдства, етнолоґиї и музеолоґиї.
Привитуюци присутних, предсидатель Югас визначел же сотруднїцтво Заводу за културу войводянских Мадярох и Сканзену зоз Сентандреї нє почина нєшка и же ше з подписованьом Спорозуменя заєднїцку фахову роботу з предходного периоду предлужує и вона достава институционални рамик.
«Од 2008. року и АПВ, як сооснователь, участвує у тей роботи. То нє лєм институционални статус, алє и одвичательносц. Одвичательносц же би ше културну рижнородносц Войводини нє наволовало лєм як вредносц, алє же бизме конкретно робели на єй очуваню», гварел предсидатель Югас наглашуюци же у предходних рок и пол дньох евидентовани седем завичайни и етноґрафски збирки, односно валалски хижи хтори чуваю традицию, од Торньоша по Войловицу.
Югас визначел же у Торди документовани и фотоґрафовани коло 500 предмети, а тиж дати и їх детальни фахови опис, цо представя вельке число алє и мали приповедки о людзох, фамелийох и валалох хтори чуваю здогадованє цалей єдней заєднїци.
«И можебуц праве у тим прави смисел диґитализациї: прешлосц нє одкладаме даґдзе на чуванє, алє ю приблїжуєме ґу будучносци», поручел Югас.
На церемониї наглашене же ше у рамикох сотруднїцтва окремне значенє пошвецує виглєдованю, документованю, очуваню и ширшому представяню материялного и нєматериялного културного нашлїдства войводянских Мадярох, медзисобней черанки фахових знаньох и искуствох, як и потримовки поєдинцом и цивилним заєднїцом хтори ше занїмаю зоз защиту културного нашлїдства.
На шветочним подписованю и представяню роботи подписнїкох спорозуменя присуствовали и предсидатель Националного совиту мадярскей националней меншини Фремонд Арпад, директорка Заводу за културу войводянских Мадярох Дєрдї Корманьош, ґенерални директор Музею на отвореним «Сканзен» др Миклош Чери, фаховци з тей обласци и представителє локалней самоуправи.