Нови Сад, 29. юлия – Предсидатель Скупштини АП Войводини др Балинт Югас и предсидателька Покраїнскей влади Мая Ґойкович отримали нєшка рядови мешачни консултациї, на хторих бешедовали о предстояцих активносцох покраїнских институцийох и приоритетох за наступни период.
У фокусу розгварки було пририхтованє предлогу ребалансу покраїнского буджету и дефинованє напрямкох за виробок буджету АП Войводини за наступни фискални рок, як основи за стабилне финансованє розвойних политикох и нєзавадзану реализацию капиталних проєктох.
Розпатрани и найважнєйши розвойни проєкти хтори ше реализує през єшеньски
период, з окремним акцентом на предлуженє укладаня до инфраструктури, модернизациї здравственей системи, законченя обнови обєктох Клинїчного центру Войводини, як и пририхтованя образовних установох за початок нового школского року. Окремна увага пошвецена и унапредзеню привредного сотруднїцтва и потримовки проєктох од значносци за очуванє културних вредносцох и дальши розвой локалних заєднїцох.
Предсидатель Скупштини АП Войводини и предсидателька Покраїнскей влади ше соглашели предлужиц рядово консултациї и блїзке институционалне сотруднїцтво, зоз цильом обезпечованя правочасного запровадзованя планованих активносцох и реализациї розвойних приоритетох Покраїни.