Бачка Тополя, 23. юний – Предсидатель Скупштини АП Войводини др Балинт Югас и предсидателька влади Мая Ґойкович, вєдно зоз предсидательом Општини Бачка Тополя Адрияном Сатмарийом, шветочно нєшка отворели заварти базен «Венус», инвестицию у суми вецей як милиярду динари, реализовану зоз потримовку Покраїнскей влади.
Предсидателька Ґойкович визначела же модерни базенски комплекс хтори отворени у Бачкей Тополї капитални проєкт и єден зоз найвекшима укладанями до спортскей инфраструктури у историї тей општини.
«Тот обєкт представя укладанє до здравя гражданох, спорту, образованя и квалитету живота гражданох. То простор дзе ше дзеци буду учиц плївац, спортисти буду витворйовац замерковани резултати, а нашо согражданє шицких ґенерацийох буду препровадзовац час у рекреациї и активним животу», наведла Ґойковичова.
Вона наглашела же вибудов того сучасного спортско-рекреативного центру резултат заєднїцкей роботи, сотруднїцтва и пошвеценосци числених институцийох, фаховцох и окончовательох.
«Вкупна вредносц роботох виноши вецей як 1,27 милиярди динари и обезпечени су зоз буджету АП Войводини, цо достаточно гутори о значносци тей инвестициї и заєднїцкей опредзелєносци же бизме творели лєпши условия за живот наших гражданох», гварела предсидателька.
Ґойковичова виражела задовольство же нєшка, после шветочного штриганя пантлїки, у новоотвореним базену отримане медзишколске першенство у плїваню, перше урядове змаганє у тим обєкту.
Бешедуюци на отвераню, предидатель Югас визначел же нови базен представя вельо вецей як цо то сучасни спортско-рекреативни обєкт, бо шведочи и розвою и проґресу Бачкей Тополї у прешлей децениї.
Остатнїх рокох у Бачкей Тополї реализовани числени розвойни укладаня хтори ше медзисобно надовязую и маю заєднїцки циль, а то же би гражданом, а насампредз младим, оможлївели вецей нагоди же би остали ту, школовали ше, занїмали зоз спортом, будовали заєднїцу и плановали свою будучносц», гварел Югас.
Вон поручел же тот обєкт резултат длугорочного розвойного планованя и сотруднїцтва шицких уровньох власци, наглашуюци же його права вредносц будзе обачлїва през ґенерациї дзецох, спортистох и фамелийох хтори го буду хасновац.
Проєкт реализовани у двох фазох. Перша фаза, 508 милиони динари, финансована зоз средствами општини Бачка Тополя, а у другей фази Покраїнска влада обезпечела 674 милиони, а локална самоуправа участвовала зоз 90 милиони динари.
По шветочним отвераню, отримане медзишколске першенство у плїваню за хлапцох и дзивчата, а найуспишнєйши змагателє достали медалї и погари. Нащивителє потим розпатрали нововибудовани комплекс хтори убудуце будзе на розполаганю спортистом, рекреативцом и шицким гражданом Бачкей Тополї и околини.
На шветочносци були присутни и народни посланїк Балинт Пастор, предсидатель Националного совиту мадярскей националней меншини Арпад Фремонд, представнїки покраїнских и локалних институцийох, як и числени гражданє.