Суботица/Нови Сад, 16. юний – Предсидатель Скупштини АП Войводини др Балинт Югас присуствовал нєшка у Суботици на комеморациї з нагоди 82. рочнїци депортациї Єврейох з того городу и у мено покраїнского парламенту положел венєц на памятнїк у дворе Синаґоґи.
Вяри и влєце 1944. року случела ше єдна з найтраґичнєйших подїйох у историї Суботици кед депортована скоро цала єврейска заєднїца до лаґрох и фабрикох ширцом Европи. З нагоди рочнїцох депортациї у Суботици ше традицийно отримує комеморациї при Синаґоґи и на других местох здогадованя, же би ше дала почесц жертвом и зачувало здогадованє на страданє суботицких Єврейох.
Верховни рабин єврейскей заєднїци у Сербиї Исак Асиел, предсидтель Єврейскей општини Суботица Роберт Сабадош и предсидатель Скупштини городу Суботица Даниел Дїванович з пригоднима бешедами поручели же пестованє култури здогадованя важне нє лєм пре почитованє жертвох, алє и пре опомнуце же би ше злодїйства з прешлосци нїґда нє повторели.
Попри предсидателя Югаса, венци положели и представнїки Влади Мадярскей, Ґенералного конзулату Републики Горватскей у Суботици, городу Суботици, Националного совиту мадярскей националней меншини, Националного совиту бунєвацкей националней меншини, єврейских општинох Нового Саду, Суботици и Зренянину и други.