Суботица/Нови Сад, 10. юний – Предсидатель Скупштини АП Войводини др Балинт Югас участвовал нєшка у Городскей хижи у Суботици на конференциї «Каждодньовосц красоти – жени, уметносц и животни стил у чаше сецесиї», хтора отримана з нагоди означованя Шветового дня сецесиї.
Бешедуюци учашнїком на конференциї, предсидатель Югас визначел же Суботица єден зоз найзначнєйших центрох сецесийней архитектури у тей часци Европи и же ше єй окремносц спатра у факту же ше зоз тим уметнїцким напрямом гражданє стретаю каждодньово, на улїцох, площох и познатих будинкох хтори формую идентитет городу.
Вон наглашел же сецесия нє лєм архитектонске нашлїдство, алє и способ розуменя швета, часц култури и колективного здогадованя на тих просторох. Югас здогаднул же творителє сецесиї охабели будуцим ґенерацийом нє лєм винїмково будинки, алє тирваци вредносци хтори дзень нєшка одредзую випатрунок и дух Суботици.
Бешедуюци о значносци очуваня културного нашлїдства, предсидатель Югас поручел же нашлїдство отрима лєм кед ше о нїм одвичательно стара, обнавя и преноши будуцим ґенерацийом. Як визначел, очуванє будовательного нашлїдства Суботици нє лєм културне, алє и дружтвене питанє, бо тоти будинки и нєшка формую идентитет городу и представяю єден зоз найзначнєйших ресурсох.
Насампредз, привитал тему тогорочней конференциї хтора пошвецена женом, уметносци и животному стилу у чаше сецесиї, оценююци же вона дава нагоду же би ше богате нашлїдство того периоду спатрело зоз нового угла.
На конференциї хтора призберала фаховцох зоз обласци историї уметносци, архитектури и защити културного нашлїдства бешедовали и предсидатель Скупштини городу Суботици Даниєл Дїванович и заменїца городоначалнїка Суботици Чила Ґоли, а у рамикох програми отрима ше и преподаваня о сецесийних витражох, архитектонским нашлїдству Канїжи и Паличу, як и о моди и положеню женох на преходу зоз 19. до 20 вику.
Подїя часц тродньовей програми означованя Шветового дня сецесиї у Суботици, хтора облапя вистави, фахово преподаваня, литературни и филмски програми, як и активносци цо су наменєни младим зоз цильом приблїжованя и очуваня културного нашлїдства.