Нови Сад, 27. май – Предсидатель Скупштини АП Войводини др Балинт Югас бешедовал нєшка зоз предсидательку Националного совиту македонскей националней меншини Зорицу Митрович, и директором Македонского информативного и видавательного центру Озреном Симяновским о положеню македонскей заєднїци у Войводини и потримовки у роботи єй институцийом.
Предсидатель Югас визначел же македонска заєднїца представя важну часц мултиетнїчного идентитету АП Войводини, и же зоз своїма институциями, културу и дружтвеним дїствованьом доприноши ґу културному богатству нашей покраїни.
«Потримовка националним заєднїцом у Войводини нє формалносц, алє континуитет и ясне стратеґийне опредзелєнє покраїнских институцийох, цо потвердзує и видвойованє средствох за роботу Националного совиту македонскей националней меншини, здруженьох и Македонского информативного и видавательного центру», гварел Югас и додал же у прешлих шейсц рокох зоз буджету покраїни видвоєни 21,7 милиони динари за роботу националного совиту, а за потримовку македонских здруженьох през розлични конкурси ресорних секретариятох додзелєни 5,1 милиони динари.
Югас насампредз наглашел доприношенє македонскей заєднїци у Сербиї на унапредзованю одношеньох двох жемох оценююци же ше добри медзидержавни одношеня додатно змоцнюю праве през сотруднїцтво людзох, заєднїцох и институцийох двох державох.
Предсидателька Националного совиту македонскей националней меншини Зорица Митрович подзековала на континуованей потримовки и винїмково добрим сотруднїцтву зоз Скупштину и Покраїнску владу. Вона информовала предсидателя Югаса о наступней шветочней академиї з нагоди 80 рокох од досельованя Македонцох до Войводини и наявела же по конєц рока будзе означене и 30 роки дипломатичних одношеньох Републики Сербиї и Републики Сиверней Македониї и 20 роки роботи Македонского информативного и видавательного центру.