Нови Сад, 27. май – Предсидатель Скупштини АП Войводини др Балинт Югас привитал нєшка у Ректорату Универзитету у Новим Садзе штредньошколцох мадярскей националносци зоз Войводини хтори, у рамикох програми Националного совиту мадярскей националней меншини, нащивели факултети Универзитету у Новим Садзе и упознали ше зоз можлївосцами предлужованя школованя у своїм штредку.
Югас визначел важносц же би млади зоз першей руки видзели яки их можлївосци очекую у Войводини и препознали же квалитетне образованє и успишну кариєру мож будовац и у своїм штредку.
«Универзитет у Новим Садзе нєшка єден зоз найзначнєйших образовних и наукових центрох у реґиону хтори ма коло 50 тисячи студентох, 14 факултети и на стотки студийни програми. Важне же би млади знали же и ту, як и у Суботици, Зомборе або Зренянину, маю нагоду здобуц знанє, напредовац и плановац свою будучносц», гварел Югас.
Бешедуюци о важних програмох за стипендованє и студентски стандард, вон наглашел значносц же ше вше векше число младих одлучує свойо образованє и кариєру будовац у своїм штредку, визначуюци же ше знанє, заєднїца и родзени край медзисобно дополнюю и моцня.
Школяром бешедовали и член Вивершного одбору Националного совиту мадярскей националней меншини Тат’яна Варю Потребич и ректор Универзитету у Новим Садзе проф. др Деян Мадич, а присуствовал и покраїнски секретар за образованє, предписаня, управу и национални меншини – национални заєднїци Роберт Отот.
Привитуюци штредньошколцох, ректор Универзитету у Новим Садзе проф. др Деян Мадич налашел важносц тей програми и визначел же студиранє нє лем драга по диплому алє и нагода же би вєдно будовали заєднїцу, будучносц и дружтво у нашей жеми.
Под час нащиви, штредньошколци були на факултетох Универзитету у Новим Садзе и у Студентским дому «Европа», хтори обезпечує змесценє и потримовку студентом мадярскей националносци зоз Войводини.