Нови Сад, 6. май – Амбасадор Републики Индиї Абишек Шукла и делеґация за запровадзованє виберанкох индийскей Покраїни Утараканд нащивели нєшка Скупштину АП Войводини и Покраїнску виберанкову комисию.
Пред роботну схадзку представительох виберанкових комисийох АПВ и индийскей покраїни, предсидатель Скупштини АПВ др Балинт Югас приял амбасадора Индиї зоз хторим бешедовал о потенциялох преглїбйованя сотруднїцтва и звекшованя индийских ивестицийох у Войводини.
«Беруци до огляду же у Войводини 84 проценти териториї твори польопривредна жем, а 30 проценти вивозу походзи зоз аґрару и же на другим месце ИТ индустрия хторей Нови Сад найвекши центер у Републики Сербиї, Войводина и индийски покраїни маю винїмково вельки потенциял же би сотруднїцтво хторе уж иснує подзвигли на висши уровень», визначел предсидатель Югас. Вон поволал амбасадора же би индийски привреднїки участвовали на Реґионалним дїловним форуму хтори АП Войводина вєшенї традицийно орґанизує у сотруднїцвте зоз Скупштину европских реґийох (АЕР), на хторим присуствує вельке число привреднїкох зоз розличних жемох зоз пейцох континентох.
Амбасадор Шукла виражел задовольство пре порихтаносц на сотруднїцтво и додал же Индия як велька жем и пията найвекша економия глєда ресурси хтори Войводина и Сербия маю у розличних обласцох. Вон наявей же делеґация зоз Индиї шлїдуюцого року нащиви Саям польопривреди у Новим Садзе, же би ше сотруднїцтво у тей обласци дзвигло на висши уровень.
Попри предсидателя Югасa зоз индийску делеґацию под час нащиви бешедовали и подпредсидателє Скупштини АПВ Александра Малетич и Борис Новакович.
На роботней схадзки Покраїнскей виберанковей комисиї и делеґациї за запровадзованє виберанкох индийскей Покраїни Утараканд, предсидатель ПВК Райко Маринкович и секретар ПВК и Скупштини АПВ др Сандра Стойкович, упознали госцох зоз виберанкову систему у АП Войводини и зоз процедуру запровадзованя виберанкох и контроли.
Госци зоз Индиї представели свою електронску систему гласаня, як и способ вибору членох виберанковей комисиї. Вони поволали делеґацию Покраїнскей виберанковей комисиї же би нащивела Покраїну Утараканд, же би ше лєпше упознали зоз виберанковим процесом у тей индийскей реґиї.