Нови Сад, 30. април – Предсидатель Скупштини АП Войводини Балинт Югас и предсидателька Покраїнскей влади Мая Ґойкович нащивели нєшка Музей Ловарского союзу Войводини, пре розписованє конкурсу за розподзельованє средствох зоз Буджетного фонду за розвой ловства у АП Войводини за 2026. рок.
«Покраїнска влада видвоєла 131 милиони динари безповратних средствох за тоту наменку же бизме потримали тот важни привредни конар и унапредзели ловиска. Намира нам була же бизме зоз тим конкурсом облапели ище векше число хасновательох и на тот способ додатно стимуловали розвой ловства», виявела Ґойковичова додаваюци же конкурс, хтори тирва по 8. май, розписал Покраїнски секретарият за польопривреду, водопривреду и лєсарство.
Як наведзене, циль конкурсу унапредзованє стану популациї дзивини и єй бивальнїкох, опреманє хасновательох ловискох, провадзенє стану даєдних файтох дзивини у АП Войводини, як и промоция и унапредзованє ловства.
Музей, отворени у децембру 2022. року у рамикох Ловарского союзу Войводини, представя єдинствену установу у Сербиї хтора шведочи о вецей як єдного вику длугокей традициї ловства на тих просторох.
Зоз вецей як 500 ловарских трофейох, богату збирку опреми, архивским материялом и рижнороднима експонатами, Музей
ма вельку културну и едукативну вредносц.
Предсидателька Ґойкович визначела же ше под нащиви бешедовало о способох за унапредзованє сотруднїцтва Покраїнскей влади и ловарского здруженя, додаваюци же ловство представя значни привредни конар и вельки потенциял за розвой ловного и риболовного туризму.
«Циль же бизме досцигли дакедишнї златни период ловства у АП Войводини, кед воно було винїмково важни туристични потенциял и кед приходзели орґанизовани ґрупи ловарох, насампредз зоз Италиї», наглашела Ґойковичова.
Вона наведла же Покраїнска влада ма стратеґию хтора унапрямена ґу розвою туризму през отверанє специялизованих музейох, хтори годни додатно збогациц туристичне понукнуце.
Предсидатель Скупштини АП Войводини Балинт Югас визначел же Ловарски союз Войводини, вецей як єден вик, слуп очуваня ловства, ровноваги у природи и природного богатства Войводини.
Вон гварел же музей Ловства, зоз єдну од найвекших виставох такого типа на тих просторох, ма окремну улогу, бо нє представя лєм збир експонатох, алє и почитованє ґу сновательом и ґенерацийом хтори робя на очуваню и розвою ловства, як и його улоги у дружтву и очуваню природи.
«У Войводини ше ловиска пресцераю на вецей як два милиони гектари, а 92 одсто у компетенциї ловарских здруженьох, цо указує на значносц локалних микрозаєднїцох у розвою ловства», виявел Югас.
Предсидатель Скупштини АПВ додал же покраїнска администрация водзи одвичательну политику у тей обласци, и же ше континуовано уклада до ловства, ловарских домох, опреманя, купованя превозкох и обнови фонду дзивини.
«Лов, ловство и ловни туризем маю вельки потенциял. Треба и на далєй робиц на їх промоциї бо маме озбильне число иножемних туристох, зоз Италиї, Нємецкей, Австриї и Анґлиї. Ловство приклад як традиция и одвичательносц ґу природи и розвой економиї – у обласци туризму –можу исц руку под руку, прецо и на далєй будземе потримовац тоту обласц», наглашел Югас.
Предсидатель Ловарского союзу Войводини Слободан Милошев подзековал, з тей нагоди, Покраїнскей влади и Скупштини Войводини на континуованей потримовки и прешвечени є же Союз будзе мац потримовку и у наступним периодзе.