Нови Сад, 22. април – Предсидатель Скупштини АП Войводини др Балинт Югас присуствовал нєшка представяню препорученьох як културне нашлїдство вихасновац за розвой туризму и привреди, у рамикох интерреґионалного проєкту «COMMHERITOUR».
Окремни фокус бул на унапредзованю нєдостаточно вихаснованого културного и ремеселнїцкого нашлїдства у руралних и периферних подручох, а з цильом моцнєня їх улоги у локалним економским розвою и унапредзованю квалитету живота локалних заєднїцох.
Предсидатель Югас визначел же часто занєдзбуєме важни факт же нашлїдство нє представя терху прешлосци, алє значну економску нагоду. Вон наглашел же Войводина як моцни и стабилни реґион хтори участвує зоз коло трецину у вкупним БДП Сербиї, потведзує свою улогу як єдного з ключних економских слупох жеми, и же попри польопривредней моци, ма и богате културне и ремеселнїцке нашлїдство, хторе представя важни, алє ище вше недостаточно вихасновани розвойни ресурс.
«Мушиме буц щири, тот ресурс ище вше нє хаснуєме достаточно. Проблем нє у тим же нє маме вредносц, алє у тим же ю нє повязуєме, нє понукаме тарґовищу и нє преношиме новим ґенерацийом. Зоз другима словами, маме потенциял, алє зме го нє претворели до розвою. Праве прето проєкт «COMMHERITOUR» важни, бо приноши модел хтори повязує знанє и тарґовище, меня ремеселнїцтво до продукту, а нашлїдство до економскей вредносци», гварел предсидатель Югас.
Вон наглашел же у Войводини нєшка дїлує коло 500 ремеселнїцких подприємствох з приблїжно 2.000 занятих, цо указує на иснуюцу основу за розвой, алє и на значни простор за дальше роснуце. Тиж визначел же циль же би ше през очуванє знаня, розвой туристичних продуктох и моцнєнє сотруднїцтва тоти потенцияли претворели до нових роботних местох, туристичних драгох и нагодох за младих, а з тим би ремеселнїцтво постало часц економиї будучносци, а розвой би достал ясни идентитет и длугорочну отримуюцосц.
Главни проєктни партнер зоз Сербиї у рамикох програми COMMHERITOUR то фонд «Европски драги» АП Войводини, а проєкт вкупно облапя 12 партнерох зоз вецей жемох Дунайского реґиону, уключуюци Мадярску, Словению, Ческу, Босну и Герцеґовину, Горватску, Румунию и Чарну Гору. Попри предсидателя Югаса, присуствовали и директор Фонду «Европски роботи» Оґнєн Допудь, як и други представителє фахового, цивилного и явного сектору.