Суботица, 1. април – Предсидатель Скупштини АП Войводини др Балинт Югас и предсидателька Покраїнскей влади Мая Ґойкович нєшка нащивели инвестицийни роботи у Суботици и Старей Моравици дзе ше прешвечели до динамики реализациї значних инфраструктурних проєктох.
Нащиву Суботици делеґация почала зоз схадзку у Городскей хижи зоз представителями локалней самоуправи, а вец обишли роботи на вибудови канализацийней мрежи у улїчкох Динка Златарича и Птуйскей, як и роботи на реконструкциї Мачванскей улїци.
Предсидатель Скупштини АП Войводини Балинт Югас визначел же Покраїнска влада предлужує вельки укладаня до розвою Суботици през унапредзенє драговей инфраструктури, реконструкцию водоводней и канализацийней мрежи, як и през проєкти у обласци туризма и защити културного нашлїдства. Окремни акцент положени на проєкти хтори доприноша ґу векшей безпечносци и квалитету живота гражданох, алє и на ровномирни розвой городских и пригородских часцох.
„Шицко цо робиме вєдно унапрямене за добробут шицких гражданох хтори жию у Суботици и на териториї Автономней покраїни Войводини. Нє укладаме лєм до вельких городских центрох, алє и до пригородских населєньох, препознаваюци потреби локалних заєднїцох. Барз нам важне очувац културне нашлїдство, як и реализовац проєкти хтори унапредзую каждодньови живот гражданох и змоцнюю вкупни розвой Покраїни“, поручел Югас.
Предсидателька Ґойкович здогадла на тото же Покраїнска влада видвоєла 150 милиони динари прейґ Управи за капитални укладаня Войводини за унапредзенє комуналней инфраструктури у єденац улїцох, зоз вецей як три километри нових драгох. Попри тим, уложени значни средства и за роботи на канализацийней мрежи хтори ше виводза у двох улїцох, з чим ше ришує длугорочни проблеми гражданох и унапредзує условия живота и здравя.
„По вельких инфраструктурних проєктох – вибудови швидкей гайзибанскей драги Беоґрад–Будапешт и отвераня Народного театру, унапрямени зме на инвестициї хтори унапредзую и злєпшую квалитет каждодньового живота гражданох. То єден спомедзи статеґийних напрямох Покраїнскей влади у наступним периодзе“, виявела предсидателька Ґойкович.
По нащиви Суботици, делеґация нащивела Дом за особи з чежкосцами у менталним розвою „Otthon“ у Старей Моравици, дзи тирваю роботи на обновйованю системи зогриваня. 
Югас з тей нагоди наглашел же до тей установи од 2022. року уложене вецей як 112 милиони динари и же тота инвестиция до обновйованя цепловодней системи ма ключну значносц за обезпечованє адекватних условийох за пребуванє хасновательох.
„Источашнє нам важне водзиц рахунку о начувствительнєйших катеґорийох жительства. Наш циль обезпечиц достоїнствени и безпечни условия за шицких хасновательох“, визначел Югас.
Предсидателька Ґойкович визначела же покраїнска администрация з вельким задовольством финансовала проєкти хтори були нєобходни же би старанє о хасновательох того дому було адекватне, а опрема сучасна и на найвисшим уровню.
”Кед чловек у даєдним периодзе живота у позициї приношиц одлуки, вец важне же би приношел адекватни одлуки хтори допринєшу ґу лєпшому животу тих хторим помоц найпотребнєйша”, визначела предсидателька Ґойкович.
Предсидательох Покраїнскей скупштини и влади у Суботици дочекали заменїца городоначалнїка Чила Ґоли, предсидатель Скупштини городу Даниел Дїванович и помоцнїк за обласц комуналних дїялносцох и явни подприємства Срдян Самарджич. Нащиви присуствовали и подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Роберт Отот и заменїк покраїнского секретара за польопривреду, водопривреду и лєсарство Золтан Тот.