Беоґрад, 31. марец – Предсидатель Скупштини АП Войводини Балинт Югас зишол ше нєшка у Беоґраду зоз предсидательку Народней скупштини Републики Сербиї Ану Брнабич и бешедовал о унапредзеню институционалного сотруднїцтва медзи републичним и покраїнским парламентом, як и о моцнєю политичного диялоґу у рамикох институцийох.
Вони ше соглашели же континуована комуникация медзи парламентами ма ключну значносц за стабилносц и ефикасне функционованє институцийох и визначели же парламенти оставаю централне место за водзенє диялоґу и артикулацию розличних становискох.
Предсидатель Скупштини АП Войводини Балинт Югас визначел же врацанє диялоґу до институцийох ма сущну значносц за дружтво и наглашел же сотруднїцтво медзи парламентами будзе додатно унапредзене.
«У актуалних дружтвених и политичних спокусох, найлєпши одвит то моцнєнє функционованя институцийох и водзенє диялоґу у рамикох парламенту. Прето зме ше догварели додатно унапредзиц сотруднїцтво и орґанизовац заєднїцку конференцию хтора позбера шицки уровнї власци и отвори простор за конструктивни диялоґ», поручел Югас.
На инициятиву предсидателя Югаса, на схадзки догварена заєднїцка конференция Народней скупштини Републики Сербиї и Скупштини АП Войводини, хтору ше пошвеци унапредзеню сотруднїцтва парламентох, черанки искуствох и моцнєню диялоґу зоз гражданами, зоз активним участвованьом локалних скупштинох городох и општинох.
Предсидателька Народней скупштини Републики Сербиї Ана Брнабич указала на значносц унапредзеня комуникациї зоз гражданами през применьованє сучасних технолоґийох.
Насампредз важне вихасновац сучасни технолоґиї же бизме унапредзели директну комуникацию зоз гражданами, лєпше розумели їх приоритети, а їх становиска ефикаснєйше преношели до институцийох и процесу приношеня одлукох, о чим будзе слова на заєднїцкей конференциї двох парламентох», виявела Брнабич.
Предсидатель Югас и предсидателька Брнабич ше соглашели же у наступним периодзе предлужа интензивне сотруднїцтво, зоз цильом моцнєня институцийох и унапредзеня квалитету живота гражданох.
Под час нащиви Народней скупштини Републики Сербиї, предсидатель Югас бешедовал и зоз подпредсидательку републичного парламенту Елвиру Ковач о предлужованю сотруднїцтва и заєднїцких активносцох двох парламентох.