Кула/Нови Сад, 16. марец – Предсидатель Скупштини АП Войводини Балинт Югас и предсидателька Покраїнскей влади Мая Ґойкович нащивели нєшка општину Кула, дзе бешедовали зоз руководством тей општини и обишли роботи на санациї Основней школи «Петефи бриґада».
Предсидатель Югас визначел же Покраїнска влада у предходним периодзе уложела значни средства у суми милион и пол еври до розвою oпштини Кула, насампредз до развою туризму, привреди и образованя.
«Винїмково значне же ше у Основней школи «Петефи бриґадa» наставу отримує и на мадярским язику, дзекуюци заєднїцкому намаганю зоз Министерством просвити Републики Сербиї. Мило ми же институциї системи препознали потребу и потримали очуванє мацеринского язику и култури меншинскей заєднїци у Кули», гварел Югас.
Предсидателька Ґойкович виражела задовольство пре нєшкайшу нащиву основней школи, општини и привреднїком у Кули, наглашуюци же Покраїнска влада зоз инвестициями потримує розвой шицких општинох у Войводини. Вона гварела же Покраїнска влада видвоєла дзешец милиони динари за роботи на санациї санитарних ґузлох у школи «Петефи бриґада», а будзе модернизована и процивогньова мрежа.
Югас и Ґойковичова под час роботней нащиви отримали схадзку зоз предсидательом Општини Кула Дамяном Миляничом, а з тей нагоди уручени и контракт у вредносци скоро 12 милиони динари, за обновйованє улїцох и драгох на териториї тей општини.
Предходно, предсидатель Югас нащивел ремеселнїцки роботнї «Древотокар» и «Челїк» у Кули, дзе бешедовал зоз власнїками и занятима. Зоз тей нагоди предсидатель Югас наглашел же фамелийни ремеселнїцки роботнї представяю важни слуп локалней привреди, алє и су и чуваре знаня и пошвеценосци.
«Їх значенє нє лєм у економским доприношеню заєднїци, алє и у преношеню схопносцох зоз ґенерациї на ґенерацию, зоз чим ше пестує идентитет наших штредкох. Потримовка таким роботньом значи потримовку вредносцом роботи, поднїмательства и очуваня ремеслох хтори часц нашого нашлїдства», гварел предсидатель Югас.
Вєдно зоз предсидателями Югасом и Ґойкович, у нащиви були и покраїнски секретар за образованє, предписаня, управу и национални меншини – национални заєднїци Роберт Отот и покраїнски секретар за привреду и туризем Ненад Иванишевич.