Нови Сад, 10. марец – Предсидатель Скупштини АП Войводини др Балинт Югас нащивел нєшка Привредну комору Войводини, дзе ше зишол зоз предсидательом тей институциї Владимиром Ґаком зоз хторим бешедовал о привредних рушаньох у Войводини у 2025. року.
У розгварки представени указателє привредних активносцох, уключуюци индустрийну продукцию, вонкашньотарґовинску черанку, стан на тарґовищу роботи и резултати у сектору польопривреди. Зоз тей нагоди визначене же вкупна вонкашньотарґовинска черанка Войводини у 2025. року була коло 23 милиярди евра, вивоз 10,6 милиярди евра, цо представя роснуце од 1,3 одсто у одношеню на прешли рок.
Предсидатель Югас оценєл же стабилни привредни рушаня и континуоване сотруднїцтво институцийох и привреди ключни за дальши розвой Покраїни.
«Привредни резултати потвердзую значносц Войводини як єдного зоз економски найважнєйшого реґиону у Сербиї. Важне же бизме предлужели моцнїц сотруднїцтво зоз привредним сектором, потримовали инвестициї и творели лєпши дїловни амбиєнт хтори допринєше отвераню нових роботних местох и дальшому роснуцу нашей економиї», наглашел Югас.
На схадзки визначене и же польопривреда остава єден зоз ключних секторох привреди, зоз оглядом на тото же Войводина участвує зоз вецей як трецину вкупного аґрарного вивозу Сербиї, хтори у 2025. року бул коло 1,9 милиярди евра. Тиж визначене же Войводина витворює коло 32 одсто вкупного вивозу Републики Сербиї, а Нємецка и на далєй найважнєйши вонкашньотарґовински партнер Покраїни.
На концу, Югас и Ґак оценєли же анализа привредних рушаньох важна основа за планованє будуцих розвойних политикох и приношенє одлукох хтори допринєшу дальшому проґресу АП Войводини.