Нови Сад, 10. марец – Предсидатель Скупштини АП Войводини др Балинт Югас и предсидателька Покраїнскей влади Мая Ґойкович отримали нєшка порядни роботни сход на хторим бешедовали о проєктох од стратеґийней значносци за АП Войводину и приоритетох у роботи покраїнских институцийох у наступним периоду.
Окремну увагу пошвецели дальшим укладаньом до здравственей системи, цо остава єден зоз приоритетох и у 2026. року, за цо видвоєне зоз покраїнского буджету 3,76 милиярди динари. На сходу було слова и о уручованю нових санитетских превозкох и превозкох за превоженє пациєнтох на диялизу здравственим установом ширцом Войводини, за цо видвоєне коло 225 милиони динари.
Югас и Ґойковичова бешедовали и о укладаньох до култури, визначуюци же отверанє нового будинку Народного театру у Суботици представя єдно зоз найзначнєйших културних укладаньох у реґиону у остатнїх деценийох.
На сходу Югас информовал предсидательку Покраїнскей влади и о своїм участвованю на нєдавно отриманей конференциї предсидательох парламентох жемох Юговосточней Европи у Будапешту, хтори пошвецени реґионалному сотруднїцтву, европским интеґрацийом и стабилносци реґиону. Собешеднїки ше зложели же Сербия остава пошвецена на европскей драги, гоч, и попри витворених резултатох и запровадзених реформох, нєправедно заостава у процесу преширйованя Европскей униї.
Собешеднїки ше соглашели же институциї Покраїни предлужа блїзке сотруднїцтво у реализациї проєктох цо су значни за дальши розвой АП Войводини и квалитет животу єй гражданох.