Суботица/Нови Сад, 4. марец – Предсидатель Скупштини АП Войводини Балинт Югас присуствовал нєшка у Суботици на шветочносци з нагоди отвераня нового будинку Народного театру.
Виражуюци задовольство пре отверанє Народного театру у Суботици, предсидатель Скупштини АП Войводини Балинт Югас визначел по шветочносци вельку значносц же тот историйни и културини будинок звонка затримал першобутни випатрунок, а знука достал подполно нови и сучасни простор хтори будзе дочековац публику.
«Процес обновйованя Народного театру нє бул лєгки и єдноставни, алє тераз кед є закончени принєше нови интензитет у културним животу у Суботици як и у цалей сиверней Бачки. Зоз оглядом на пущанє до роботи швидкей гайзибанскей драги Беоґрад – Будапешт, очекуєм числених нащивительох зоз обидвох бокох гранїци хтори буду уживац у тим зданию и у шицких будуцих представох ансамблу Суботицкого театру», гварел предсидатель Югас.
Предсидателька Покраїнскей влади Мая Ґойкович визначела же дїя отвераня суботицкого Народного театру представя важну часц историї и того городу и културного и театралного животу цалей держави.
Министер култури у Влади Републики Сербиї Никола Селакович гварел же заєднїцки задаток републичней и покраїнскей
влади, як и городу Суботици, пренайсц способ, по його оцени, же би на єдней зоз трох найсучаснєйших театралних сценох наступели и уметнїки зоз других державох.
После вецейрочней реконструкциї и вибудови, Суботица достала сучасни театрални обєкт, обєкт поверхносци коло 14.600 квадратни метери, хтори опремени зоз модерну сценску технїку и провадзацим змистом.
Нови простор обезпечи значно лєпши условия за роботу ансамблу, технїчних службох и госцуюцих уметнїкох, як и векши комфор за публику. Тот театер пестує драмску творчосц на сербским и мадярским язику, чуваюци мултикултурни идентитет Суботици и Войводини.
Шветочне отверанє будзе означене и зоз першу представу у новим будинку, хтора заказана за пияток, 6. марец. Публика будзе мац нагоду опатриц драму «Собирни центер» Душана Ковачевича, у режиї Дарияна Михайловича, зоз чим символично почнє нове поглавє у роботи тей значней културней установи.
Отверанє нового будинку Народного театру представя важни крочай у дальшим унапредзованю културней инфраструктури у АП Войводини и потвердзує пошвеценосц институцийох до укладаня до уметносци и очуваня културного нашлїдства.
На шветочносци були присутни и народни посланїк Балинт Пастор, городоначалнїк Суботици Стеван Бакич и представнїки републичних и покраїнских институцийох.