Будапешт/Нови Сад, 27. фебруар – Предсидатель Скупштини АП Войводини Балинт Югас бешедовал нєшка у Будапешту з предсидательом Парламенту Мадярскей Ласлом Кевером о дальшим моцнєню институционалного сотруднїцтва, унапредзованю парламентарних вязох и преглїбйованю одношеньох Републики Сербиї и Мадярскей.
Югас и Кевер ше стретли на марґинох 12. Конференциї предсидательох парламентох жемох Юговосточней Европи, хтору традицийно кажди други рок орґанизує предсидатель Парламенту Мадярскей.
«Парламентарне сотруднїцтво представя важну часц вкупного сотруднїцтва и добрих одношеньох наших двох державох. Праве прейґ интензивного диялоґу и медзисобного розуменя на уровню парламентох додатно моцнїме партнерство Сербиї и Мадярскей и доприношиме стабилносци и розвою цалого реґиону», визначел предсидатель Югас.
Вон додал же Скупштина АП Войводини остава пошвецена пестованю блїзких одношеньох з институциями Мадярскей, як и сотруднїцтву хтори доприноша економскому розвою, очуваню културного идентитету и моцнєню вязох медзи заєднїцами з обидвох бокох гранїци.
Югас и Кевер бешедовали и о моци мадярскей националней заєднїци у АП Войводини и єй значней улоги у вкупних одношеньох Сербиї и Мадярскей. Югас наглашел значносц потримовки очуваню културного и язичного идентитету мадярскей заєднїци, як и єй доприношеню моцнєню медзидержавних вязох и реґионалного сотруднїцтва.
Предсидатель Парламенту Мадярскей визначел же мадярска заєднїца у Войводини, зоз своїм институционалним розвойом, културну моцу и активним участвованьом у явним живоце, представя моцну подпорку стабилносци и природни мост сотруднїцтва медзи Сербию и Мадярску.