Будапешт/Нови Сад, 27. фебруар – Предсидатель Скупштини АП Войводини Балинт Югас и подпредсидателька Скупштини Александра Малетич участвовали нєшка у Будапешту на 12. Конференциї предсидательох парламентох жемох Юговосточней Европи, яку кажди два роки традиционално орґанизує предсидатель Парламенту Мадярскей.
Делеґацию Републики Сербиї на тим значним сходзе предводзела предсидателька Народней скупштини Републики Сербиї Ана Брнабич, а у присуству предсидательох парламентох жемох Юговосточней Европи и Вишеґрадскей ґрупи, бешеду учашнїком отримал и предсидатель Влади Мадярскей Виктор Орбан.
У своєй бешеди, предсидатель Югас подзековал предсидательови Парламенту Ласлови Кеверови на традиционалней орґанизациї тей конференциї хтора доприноши моцнєню диялоґу, як и Мадярскей на континуованей и дошлїдней потримовки нашей жеми.
«Процес преширйованя будзе кредибилни лєм кед є засновани на заслугох и кед реформи приноша конкретни проґрес. Гоч Сербия запровадзує реформи и отвера поглавя, европски интеґрациї стаґную. Войводина у тим процесу ма окремну улогу як мост медзи Сербию и Европску унию, як и медзи кулутурами, економиями и институциями», гварел Югас и визначел же диялоґ и сотруднїцтво фундамент розвою Юговосточней Европи.
Друга часц конференциї пошвецена «Можлївосцом економского розвою и звекшаню конкурентносци у реґиону», а
предсидатель Югас визначел же Сербия у 2025. року витворела робну черанку у суми 33 милиярди евра, зоз чого дзешец милиярди зоз Войводини цо указує же тота реґия економске место злучованя.
«У Войводини дїлує 104 индустрийни зони, прерабяцка индустрия доминує у вивозу, а модернизована польопривреда и поживова индустрия подмирюю европске тарґовище. Зоз ясну лоґистику, инфраструктуру и стратеґийним планованьом у диґитализациї, желєней транзициї и штучней интелиґенциї, Войводина ше афирмує як конкурентни реґион у юговосточней Европи», наглашел предсидатель Югас.
Бешедуюци о спокусох зоз якима ше Европа зочує, предсидатель Влади Мадярскей Виктор Орбан визначел же ситуация у України и енерґетска криза вше вецей обтерховює економиї жемох членїцох ЕУ, и же ше прето вше вецей зужує простор за преширйованє. Вон поручел державом у процесу придружованя же нє треба одступиц од европскей драги, алє же нужне моцнїц власни розвойни стратеґиї, зоз затримованьом европских амбицийох.
На конференциї, на хторей Скупштина АПВ участвує як почесни госц, участвовали и представнїки парламентох Републики Сербиї, Чарней Гори, Сиверней Македониї, Албаниї и Босни и Герцеґовини, зоз учасцу предсидательох и представнїкох парламентох жемох Вишеґрадскей ґрупи, як и делеґация реґионалних парламентох и представнїцких целох.
Учашнїки конференциї подписали заєднїцку вияву з яку потвердзую моцну потримовку преширйованю ЕУ и пошвидшованю процесох европских интеґрацийох жемох юговосточней Европи. Визначена важносц реформох, улога парламентох, реґионалного сотруднїцтва и поступного уключованя кандидатох до ЕУ, зоз поволанку державом членїцом же би пошвидшали процес преширйованя.
Конференция предсидательох парламентох жемох Юговосточней Европи представя инициятиву Мадярского парламенту и од 2003. року ше отримує кажди други рок у Будапешту.