Нови Сад, 2. фебруар – Шветочносц з нагоди означованя 107 роки од снованя Привредней комори Войводини (ПКВ) отримана нєшка у Новим Сазде, у присиству представнїкох покраїнских институцийох, привреди, медзинародних партнерох и добитнїкох рочних припознаньох.
У бешеди присутним, предсидатель Скупштини АП Войводини Балинт Югас визначел же ПКВ припада институцийом хтори тирваю нє лєм прето же су засновани на предписаньох, алє прето же су глїбоко укоренєни у економскей реалносци и животу людзох.
«Привредна комора Войводини старша як велї держави, системи и економски модели. Прежила кризи и трансформациї, алє вше була фундамент привреди и место довирия», поручел Югас. Вон наглашел же АП Войводина у 2025. року участвовала зоз 32 одсто вкупного вивозу Републики Сербиї, наглашуюци же окреме значна пременка структури вивозу, зоз вше векшу учасцу продуктох з висшу додату вредносц, прерабяцкей индустриї индустрийней опреми.
Югас визначел и же розвой подрозумює квалитетни инвестициї, институционалну стабилносц и партнерство держави и привреди, насампредз у условийох диґиталней и желєней транзициї.
«Покраїнски институциї оставаю партнер привреди, партнер стабилносци, розвою и тим хтори ту робя, продукую и оставаю», наглашел Югас.
Предсидателька Покраїнскей влади Мая Ґойкович визначела же ПКВ слуп привредного розвою, стабилносци и повязованя знаня, роботи и одвичательносци.
«Тота драгоцина рочнїца представя свидоцтво и о витирвалосци, схопносци присподобйованя и моци єдней заєднїци хтора през розлични и часто чежки историйни обставини вше знала зачувац тото цо найважнєйше – довириє до роботи, поднїмательносц и заєднїцки проґрес», гварела Ґойковичова.
Городоначалнїк Нового Саду Жарко Мичин гварел же ПКВ фундамент розвою, сотруднїцтва и моцней привреди.
«Предлужуєме укладац до отримуюцого розвою, нових роботних местох и партнерства зоз привреду», поручел Мичин.
Предсидатель ПКВ Владимир Ґак визначел же Комора уж 107 роки предствя сиґурни фундамент привреднїком и мост медзи привреду, институциями и медзинароднима партнерами, наглашуюци же у наступним периоду приоритети буду диґитализация, отримуюци розвой, унапредзенє коморских услугох и швидка доступносц точних информацийох ґу привреди.
На шветочносци пущена до роботи платформа «Мой маркет», єдинствене онлайн место хторе наменєне промоциї и предаваню продуктох поднїмателькох, хтора призберує жени поднїмательки на єдним месце и оможлївює швидки и безпечни способ потримовки домашнєй продукциї.
У рамикох шветочносци традиционално додзелєни рочни награди ПКВ «Коста Миросавлєвич» за прешли рок, хтори достали компаниї BMK Agrar d.o.o. зоз Старей Пазови, AG-UNS Архитектонско-будовательни институт d.o.o. зоз Нового Саду и TOYO TIRE SERBIA d.o.o. зоз Индїї, а за Привреднїцу рока и Привреднїка рока преглашени Миа Костич-Страїн («Puerra») и Александар Ґалич («Galens»), а награда «Златне пирко привреди» додзелєне компаниї Дневник Войводина Прес d.o.o.