Нови Сад, 28. януар – Предсидатель Скупштини АП Войводини Балинт Югас участвовал нєшка на отвераню конференциї проєкту «Интелиґентни аґро-иновациї и програма оспособйованя – SAGGITA», хтора отримана у Науково-технолоґийним парку у Новим Садзе.
Бешедуюци учашнїком, Югас визначел же проєкт SAGGITA представя преход зоз традиционалней до сучасней польопривреди, наглашуюци значносц знаня и образованя.
«Войводина ма вецей як 111 тисячи польопривредни ґаздовствa и 1,65 милиони гектари обрабяцей жеми, алє нєшка лєм жем нє достаточна, потребни иновациї и людзе хтори знаю як тоту жем вихасновац же би була конкурентна», визначел Югас, указуюци на конкретни доприношеня того прейґгранїчного проєкту.
«Вкупни буджет проєкту SAGGITA виноши 3,4 милиони евра, през реализацию проєкту у оспособйованьох будзе участвовац 532 нащивителє, а найменєй 400 успишно закончи програми. То значи, 400 нови особи зоз сучаснима знанями за аґрар у реґиону, 400 конкретни судьби и 400 причини же би людзе остали у своїм краю», наглашел Югас и додал же прешлого року Покраїна уложела вецей як 4,3 милиярди динари до аґрарного сектору.
«Нєшка нє укладаме лєм до механїзациї, укладаме до людзох и знаня, бо модерна польопривреда настава у лабораторийох, стартапох и иновацийних центрох. Вше було же, яка нєшка шатва, така наютре будзе жатва, а през SAGGITA програму шеєме знанє хторе нам длугорочно приноши конкурентносц и обстоянє людзох у Войводини», гварел Югас.
Водзаци партнер на проєкту SAGGITA то Фондация «Pro Scientia Naturae» зоз Сенти, а партнере Фонд за европски роботи и розвой АП Войводини, Општина Морахалом и Польопривредни центер за фахове образованє Alfoldi зоз Мадярскей. Проєкт ше финансує зоз програми Interreg IPA Мадярска-Сербия 2021-2027. Вкупни буджет проєкту 3.461.821,20 евра, а 85 одсто средства донация ЕУ. 
Присутни бул и покраїнски секретар за реґионални розвой, медзиреґионалне сотрудїцтво и локалну самоуправу Александар Софич, а на конференциї бешедовали и Неманя Мартинович зоз Министерства за европски интеґрациї Републики Сербиї, представнїки проєктних партнерох, фаховци и менаджере проєкту.