Нови Сад, 22. януар – Предсидатель Скупштини АП Войводини Балинт Югас и предсидателька Покраїнскей влади Мая Ґойкович отримали нєшка рядову роботну схадзку на хторей бешедовали о планох розвою Покраїни у 2026. року и приоритетох у наступним периодзе.
На схадзки розпатрени цек реализациї найзначнєйших покраїнских проєктох, з окремним огляднуцом на унапредзованє транспортней и комуналней инфраструктури, потримовку з инвестициями и моцнєнє капацитетох явних установох.
Бешедовало ше и о дальшим злєпшованю системи здравственей защити и образованя, моцнєню привредних потенциялох Покраїни, як и о ровномирним реґионалним розвою и потримовки локалним самоуправом.
Предсидатель Югас визначел значносц потерашнього успишного сотруднїцтва Скупштини АП Войводини и Покраїнскей влади, цо доприноши ефикасному применьованю покраїнских одлукох и стабилному функционованю институцийох. Предсидателька Ґойкович наглашела же континуовани диялоґ медзи Скупштину и Владу предусловиє за благочасне реаґованє на виволаня и успишне запровадзованє розвойних политикох.
Рядови мешачни схадзки предсидателя Скупштини АПВ и Покраїнскей влади устаємнєна пракса од початку їх мандату, а тота схадзка перша у тим року и єй циль утвердзиц динамику роботи и приоритетох за 2026. рок и предлужиц унапредзованє сотруднїцтва медзи двома институциями.