Нови Сад, 24. децембер – Предсидатель Скупштини АП Войводини Балинт Югас винчовал нєшка Крачун шицким гражданом хтори найрадоснєйше християнске швето славя по григориянским календаре.
«Крачун швето радосци, надїї и спасеня. Най нас шветлосц крачунских дньох здогаднє же заєднїцтво, блїзкосц и старанє о каждей особи ядро нашей вири и най нас повола на розуменє, пребачованє и солидарносц. Най нам Крачун будзе здогадованє на тото цо у живоце наисце важне. Най у наших шерцох буду мир и розумносц, алє и моц же бизме подали добре своїм наймилшим и шицким другим у хвилькох радосци, алє и спокусох. Щешлїви и благословени Крачун!»