Нови Сад, 20. новембер – З уводнима викладанями предсидателя Скупштини АП Войводини Балинта Югаса, предсидательки Покраїнскей влади Маї Ґойкович и предсидателя Привредней комори Войводини Владимира Ґака нєшка шветочно отворени Реґионални дїловни форум.
Тот значни привредни сход, хтори по осми раз орґанизую Автономна покраїна Войводина и Скупштина европских реґийох (АЕР) у сотруднїцтве зоз Привредну комору Войводини (ПКВ), позберал вецей як 130 учашнїкох зоз велїх жемох Европи, Азиї и реґиї.
У бешеди присутним предсидатель Югас визначел же тота подїя постала ключне место стретнуца привреднїкох, институцийох и медзинародних партнерох, алє и простор дзе ше идеї претваряю до конкретних проєктох и нових дїловних вязох.
«Зоз потримовку Привредней комори Войводини и числених партнерох, Форум вироснул до найшвидше роснуцей реґионалней мрежи дїловного сотруднїцтва и значно пошвидшал видлївосц войводянскей привреди на медзинародней сцени», гварел Югас и наглашел же Войводина нєшка порихтана за инвестициї и технолоґийни развой..JPG)
«Од 2018. року до АПВ уложене вецей як штири милиярди евра странских инвестицийох, док нєзанятосц зменшана», гварел Югас и визначел же кажда догварка хтора заключена на Форуму представя нову нагоду за розвой, нови роботни места и моцнєйшу Войводину.
Предсидателька Покраїнскей влади Мая Ґойкович визначела же тот Форум нагода же би ше бешедовало о ключних темох хтори формую економску будучносц реґиона и представяю моц Войводини – привреди, туризма, автомобилскей индустриї и польопривреди.
У ПКВ нєшка подписани спорозуменя о сотруднїцтве, хтори представяю важну основу за будуци инвестициї, отваранє нових погонох и нових роботних местох, медзи Привредну комору Войводини и Развойну аґенцию Сербиї, Привредну комору Републики Сербскей, Желєним навиґатором и Союзом привредних коморох Сиверней Македониї.
«Тоти спорозуменя нє лєм формалносц, вони представяю конкретни крочаї ґу реґионалному сотруднїцтву, черанки знаня и заєднїцким проєктом хтори отвераю дзвери ґу новим инвестицийом и економским инициятивом», гварела Ґойковичова.
Предсидатель Привредней комори Войводини Владимир Ґак визначел же, з оглядом на интересованє и число учашнїкох,тот Форум превозишол рамики реґионалного и же ше наруцел як стратеґийна платформа за дїловне сотруднїцтво. Вон визначел значносц партнерского одношеня зоз Привредну комору Истанбулу, з чим отворени дзвери за ище продуктивнєйше повязованє зоз турскима фирмами и инвеститорами.
Реґионални дїловни форум настал як инициятива Скупштини АП Войводини и АЕР, у активним сотруднїцтве зоз Привредну комору Войводини, а прероснул до єдней спомедзи найзначнєйших дїловних подїйох у реґиону.
Перши дзень учашнїкох обчекую панел-дискусиї о ключних секторох, од Дунаю як туристичного бренда прейґ интелиґентней мобилносци и автомобилскей индустриї до аґрарно-поживового ланцу, як и орґанизоване Б2Б стретнуце хтори уж традицийно резултую з новима дїловнима аранжманами.
Други дзень локални самоуправи зоз Войводини – Бачка Тополя, Ириґ и Зренянин, як и општина Дрвар представя свойо проєкти и инвестицийни потенцияли.