Салцбурґ / Нови Сад, 29. септембер – Предсидатель Скупштини АП Войводини Балинт Югас оценєл нєшка у Салцбурґу, дзе участвує на 21. Самиту Европи хтори орґанизує Институт европских реґийох (ИРЕ) же за АП Войводину од велькей значносци активне участвованє у процесох реґионалного сотруднїцтва и черанки искуствох.
Делеґация Скупштини АП Войводини, чийо члени попри Югаса и подпредсидателька Скупштини Александра Малетич и ґенерални секретар др Сандра Стойкович, участвує у роботи того значного сходу хтори зазберує водзацих представнїкох европских реґийох, политичних и академских заєднїцох, як и привредних институцийох.
На Самиту предсидатель Югас бешедовал о можлївосцох нових заєднїцких инициятивох и преглїбйованю сотруднїцтва зоз проф. др Францом Шaусберґером, предсидательом и сновательом ИРЕ, як и зоз представнїками розличних европских реґионох и институцийох
«Тот традицийни форум то место на хторим ше будує диялоґ, глєда заєднїцки ришеня и розвива партнерства. За Войводину од винїмковей значносци активно участвовац у таких процесох прето же реґионалне сотруднїцтво приноши конкретни хасен гражданом. Прешвечени сом же и тогорочни стретнуца отворя нови нагоди за сотруднїцтво», гварел Югас.
Предсидатель Югас додал и же за нашу покраїну важне же би була препознатлїви реґион на мапи ЕУ, як и же уж ма барз позитивни имидж у Европи и Бриселу, без огляду на тото же дакеди исную розлични становиска о дзепоєдних питаньох.
Проф. др Франц Шаусберґер визначел же медзи велїма бенефитами реґионалного сотруднїцтва и факт же ше представнїки реґиона часто лєгчейше розумя и дойду до заєднїцких ришеньох як на националним уровню. Вон виражел жаданє же би ИРЕ у сотруднїцтве зоз АП Войводину орґанизовал заєднїцку конференцию у Новим Садзе о шицких актуалних питаньох вязаних за реґионални политики и унапредзенє сотруднїцтва реґиона.
Тогорочни Самит Европи позберал числених водзацих представнїкох европских реґионох, владох, парламентох и привреди. На програми були сесиї пошвецени ключним темом, уключуюци демоґрафски виволаня, будучносц демократиї, безпечносц подмирйованя з енерґию, циркуларну економию и мобилносц. Зоз учашнїками бешедовали и Клаудия Плаколм, министерка за Европу и интеграциї Австриї, Тибор Наврачич, министер за державну управу и реґионални розвой Мадярскей, и Йоханес Хан, бувши комесар ЕУ.
Институт европских реґийох (ИРЕ) основани 2004. року у Салцбурґу, з цильом промовованя реґионалного сотруднїцтва у Европи и моцнєня улоги европских реґионох и локалних власцох у европских процесох приношеня одлукох. ИРЕ то и платфома за черанку искуствох и найлєпших праксох медзи реґиями, городами, општинами и розличнима привреднима секторами.