Нови Сад, 24. септембер – Предсидатель Скупштини АП Войводини Балинт Югас присуствовал нєшка на шветочним отвераню 56. Медзинародного сайму лову и риболову и Сайму еколоґиї – «Лорист» и вєдно з предсидательку Покраїнскей влади Маю Ґойкович, министерку защити животного штредку у Влади Републики Сербиї Сару Павков и ґенералним директором Новосадского сайму Слободаном Цветковичом, обишол викладачох тей традиционалней манифестациї.
«З вецей як 50 роками традициї, тота значна саямска манифестация нас здогадує на вельке природне богатство хторе наша покраїна ма и як ше високо котира на полю ловного туризму и ловства, нє лєм у держави алє и у цалим реґионє», гварел предсидатель Югас и здогаднул на слова свойого предходнїка Иштвана Пастора хтори бешедовал о тим же нас ЛОРИСТ каждого року здогадує на обовязку хтору шицки маме, а то чувац и унапредзовац, за будуци ґенерациї, тото цо нам предходни ґенерациї охабели.
Югас визначел важносц медзинародного характеру тих саймох и наглашел же слово о винїмковей нагоди кед ше на истим месце стретаю фах, наука и привреда и вона оможлївює похасновац резултати того сотруднїцтва и представиц покраїну реґиону на найлєпши способ. Вон поволал гражданох же би у цо векшим чишлє нащивели тоту значну манифестацию на хторей участвую вецей як сто викладаче и же би вихасновали нагоду упознац ше з новосцами у области лову, риболову и еколоґиї. 
56. Међународни саям лову, риболову и еколоґиї «Лорист» шветочно отворела предсидателька Покраїнскей влади Мая Ґойкович хтора визначела же вон спада до шора найвекших смотрох того типу у юговосточней Европи.
«Тот саям место на хторим ше злучую традиция, знанє и сучасни досцигнуца у очуваню природи и еколоґиї. Од окремней важносци тото же «Лорист» того року у фокусу ма еколоґию», наведла предсидателька Ґойкович.