Сента, 11. септембер – Предсидатель Скупштини АП Войводини Балинт Югас присуствовал нєшка у Сенти на шветочней презентациї прототипу новей огньогасней превозки, хтору заєднїцки розвили компания BM Heros Zrt. зоз Мадярскей и FAP AD зоз Сербиї.
Предсидатель Югас визначел же тото сотруднїцтво, як и сама промоция хтору орґанизовал Мадярско-Заходнобалкански дїловни совит зоз партнерами, значни и автентични приклад конкретних резултатох историйного помиреня и партнерских и приятельских одношеньох Сербиї и Мадярскей.
„Тот прототип ясни приклад як добри одношеня двох народох и двох державох приноша конкретни економски резултати. Зоз заєднїцким анґажованьом наших компанийох винайдзене ришенє з яким ше унапредзи безпечносц гражданох и укаже же добри билатерални одношеня даваю конкретни и хасновити резултати за цали реґион", поручел предсидатель Югас и наглашел же здружени ресурси и знанє можу витвориц ришеня з якима ше доприноши и ґу индустрийному розвою и ґу векшей сиґурносци гражданох.
Вон додал и же ше наздава же ше нови огньогасни превозки будзе продуковац у Сенти, наглашуюци же тот проєкт нє значни лєм за Сербию и Мадярску, алє и за жеми цалого Заходного Балкану.
„АП Войводина моцно потримує проєкти з якима ше моцнї партнерство зоз сушеднима жемами и реґиями и приноши просперитет за шицких", наглашел Югас.
Представителє компанийох цо реализую тото сотруднїцтво визначели же проєкт BM Heros–FAP представя важни крочай у моцнєню индустрийного сотруднїцтва Сербиї и Мадярскей, алє и моцни приклад иновативного приступу у обласци явней безпечносци.
Прототип виробени на шасиї хтору продукує FAP, зоз специялизовану надбудову компаниї Heros, а наменєни є сучасним потребом огньогасних єдинкох у Сербиї и ширшого реґиону Заходного Балкану.
Попри презентациї самей превозки, програма облапяла и виставу других типох огньогасних превозкох и специялизованей опреми, презентациї компанийох учашнїцох, як и практичну демонстрацию нового прототипу.
На шветочносци присуствовали числени представителє привреди и институцийох, як и амбасадор Мадярскей у Беоґрадзе, Йожеф Мадяр.