Сента/Нови Сад, 11. септембер – Предсидатель Скупштини АП Войводини Балинт Югас бул нєшка на шветочней схадзки Скупштини општини Сента з нагоди означованя Дня општини Сента и 328. рочнїци Сентянскей битки.
Схадзку отворел предсидатель Скупштини општини Сента Веселин Петрович, зоз шветочну бешеду присутних привитала предсидателька Општини Гайналка Бурань, а подзелєни и найвисши општински припознаня заслужним поєдинцом.
По законченю шветочней схадзки, предсидатель АП Войводини Балинт Югас спомнул значносц Сентянскей битки хтора пременєла цек историї у тей часци Европи и означела початок валяня Отоманского царства.
«Одлучуюца побида Еуґена Савойского над Отоманским войском у Велькей бечскей
войни отворела драгу ґу прегварком хтори конєчно приведли до Карловецкого мира. На нас же бизме ше зоз глїбоким пиєтетом здогадовали шицких жертвох и нє дошлєбодзели забуц прешлосц. Тиж, обовязни зме патриц напредок и предлужиц робиц за добробут гражданох Сенти и цалого краю за моцнєйшу заєднїцу, достоїнствени живот и будучносц у хторей ше кажде будзе чувствовац як сиґурни и почитовани», поручел предсидатель Югас.
Пред початок шветочней схадзки положени венци на спомин-означенє на Тиси дзе ше случела Сентянска битка як свойофайтови мемориялни комплекс шицким жертвом цо су заслужни за вельку побиду 1697. року.