Нови Сад, 16. април - Предсидатель Скупштини АП Войводини Балинт Югас бешедовал нєшка з новим директором Видавательного заводу Форум Петером Анталовичом о дальшей роботи тей институциї и будуцим напряме розвою.
Винчуюци директорови на менованю, предсидатель Югас визначел же пред нїм озбильна и одвичательна мисия з оглядом на факт же ше Форум под час вецей як шейц деценийох розвил до єдней з найважнєйших културних установох войводянских Мадярох.
«Видавательни завод Форум, як и други установи од значносци за очуванє култури,
идентитету, язику и традициї националних заєднїцох у Войводини будзе мац вше полну потримовку покраїнского парламенту у своєй роботи, як и мою особнє», наглашел предсидатель Югас.
Предсидатель Югас и директор Анталович ше зложели же Форум по тераз указал винїмкову професионалносц у шицких сеґментох дїлованя од селекциї змистох по квалитет своїх виданьох и же и далєй будзе пошвецени очуваню високого стандарду у видавательстве и своїм доприносу у обласцох култури и образованя.