Бачка Тополя/Нови Сад, 14. април – Предсидатель Скупштини АП Войводини Балинт Югас и предсидатель Привредней комори Войводини (ПКВ) Владимир Ґак нащивели нєшка Бачку Тополю, дзе зоз руководством тей општини бешедовали о инвестицийних потенциялох хтори дава Индустрийна зона у тим месце, як и о можлївосцох и инициятивох за дальше економске и привредне напредованє.
У фокусу нащиви були плани за моцнєнє локалней привреди, а предсидатель Югас у бешеди за медиї визначел же општином и локалним заєднїцом потребни мир и розвой место анархиї.
«Интересованє за инвестованє и укладанє до войводянскей општини то каждодньове зявенє, а предсидатель ПКВ, пан Ґак и я жадаме тому дац ище конкретнєйше доприношенє. Вєдно зме маповали одредзени локални самоуправи хтори маю вельки потенциял и Бачка Тополя ше ту сиґурно визначує, алє нє забудземе анї Мали Идьош, анї други штредки. Зоз заєднїцким закладаньом можемо вельо допринєсц, привесц нови инвестициї, подзвигнуц животни стандард людзох и отвариц нови роботни места», визначел Югас.
Вон додал и же уж вецей як дзешец роки сотрудзує зоз Индустрийну зону у Бачкей Тополї, хтора тераз скоро цалком вихаснована, алє єст ище места и потенциялу за нови компаниї. 
«Жадаме спонукнуц шицки општини же би вихасновали можлївосци яки прейґ буджету обезпечую покраїнска и републична влада, же би нашо локални самоуправи и заєднїци постали цо лєпше место за живот за шицких», наглашел Югас.
Предсидатель Привредней комори Войводини Владимир Ґак визначел же ПКВ виробела прегляд розвитосци општинох у АП Войводини.
«Жадаме обисц шицки општини и бешедовац о розвитосци индустрийних зонох, потенциялних потребох за укладанями же бизме мали информациї за наших привреднїкох и страних инвеститорох», визначел предсидатель Ґак. Вон додал же Бачка Тополя ма вельки потенциял – два ключни точки – то швидка гайзибанска драга Беоґрад – Будимпешта и автодрага Е 75.
«Чули зме яка розполагаюцосц индустрийней зони и ПКВ у наступним периодзе будзе робиц на злучованю потенциялних инвеститорох и представнїкох општинох», гварел Ґак.
Предсидатель општини Бачка Тополя Адриан Сатмари визначел же моцна привреда у єдней локалней самоуправи значи и моцну заєднїцу. Вон представел компаративни першенства Индустрийней зони у Бачкей Тополї и визначел же подписани контракт з портуґалским продуковательом авто-часцох хтори идуцого року отвори свой погон и обезпечи нови роботни места.
Югас и Ґак, вєдно зоз предсидательом Општини Бачка Тополя Адрианом Сатмарийом и предсидательом Скупштини општини Сашом Срдичом, як и зоз членами Општинскей ради, обишли фабрику «ЕМ Commerce», хтора специялизована за продукцию мебля и плочастих материялох.
Делеґация потим обишла и компанию «Услуга», хтора уж 66 роки специялизована за продукцию погребней опреми. Як водзаци продукователє тей индустриї у Сербиї, їх продукти ше пласує як на домашнїм, так и на иножемним тарґовищу.