Нови Сад, 4. април – Предсидателька Покраїнскей влади Мая Ґойкович и предсидатель Скупштини АП Войводини Балинт Югас були нєшка у нащиви Канїжи, дзе з руководством Општини бешедовали о планох за унапредзенє инфраструктури, з акцентом на здравство, образованє и туризем.
Ґойковичова и Югас з тей нагоди нащивели Специялни шпиталь за регабилитацию «Баня Канїжа», дзе бешедоване о потреби за реконструкцию баньского комплексу.
Потим обишли и Войводянску пасовацку академию, наменєну младим хтори свою спортску будучносц видза у нашим найтрофейнєйшим олимпийским спорту, як и школске ґаздовство у рамикох Польопривредно-технїчного штредньошколского центру «Йожеф Беседеш».
«Покраїнска влада видвоєла 50 милиони динари за першу фазу ушореня «Банї Канїжа», хторей нєобходна реконструкция, прето же ше до нєй нє укладало дзешатками роками. Обчекуєм же на схадзки принєшеме одлуку о согласносци за шицки потребни дозволи же би ше почало заменьовац склєняну фасаду хтора ше находза коло базену у хторим ше окончує терапиї», наведла предсидателька и додала же наступна инвестиция будзе набавка нових терапийних кадох.
Ґойковичова визначела же руководство Општини винєсло нєшка длугорочни плани, як цо то вибудов спа-центру
рекреативного характеру блїзко при Банї.
«То винїмково важне за нашу покраїну и за општину Канїжа, бо може злєпшац живот жительом, оможлївиц нови роботни места и прицагнуц туристох», виявела предсидателька Ґойкович.
Под час нєшкайшей нащиви, як визначела предсидателька, бешедовало ше и о потреби за вибудов дому за школярох Штреднєй польопривредней школи, хтори би бул на розполаганю шицким и тим хтори нащивюю Войводянску пасовацку академию, хтора, по єй словох, вельки спортски потенциял за нашу державу.
«Будземе бешедовац о тим кельо средства треба видвоїц за реализацию тей инвестициї, а проєктованє уж почало и плановане же би ше тото подняце потримало идуци рок прейґ Управи за капитални укладаня», наглашела Ґойковичова.
Предсидатель Скупштини АП Войводини Балинт Югас визначел значносц Пасовацкей академиї у Канїжи и гварел же вона символ мадярско-сербского сотруднїцтва и приятельства. Вон наглашел же окремну вредносц дава и тото же у Пасовацкей академиї тренираю дзеци з обидвох заєднїцох и же ше успихом и освоєним медальом радую шицки, и у Републики Сербиї и у Мадярскей.
«То добра основа за нашо будуце сотруднїцтво. Тота институция приклад же Канїжа може прероснуц до правого штредньошколского центру», гварел Югас и додал же у плану, попри Сенти, вибудов дому за школярох и у Канїжи.
Вон наведол же општина Канїжа ма успишних поднїмательох и привреднїкох и виражел прешвеченє же ше предлужи добре сотруднїцтво з локалну самоуправу, цо у велїм допринєше дальшому розвою тей општини.
Предсидатель Општини Канїжа Роберт Фейстамер подзековал Ґойковичовей и Югасови на нащиви и визначел же ше нєшка бешедовало о окреме важних розвойних проєктох.
«Як локална самоуправа и далєй будземе узко сотрудзовац з покраїнскима институциями. По тераз зме мали одличне сотруднїцтво з Покраїну и обчекуєм же воно будзе предлужене и убудуце», виявел Фейстамер.
Подїї присуствовал и подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Роберт Отот.