Сента, 21. марец - Предсидателька Покраїнскей влади Мая Ґойкович и предсидатель Скупштини АП Войводини Балинт Югас були нєшка у роботней нащиви општини Сента.
Ґойковичова и Югас з тей нагоди, зоз сотруднїками и предсидательку Општини Гайналку Бурань, обишли Основну школу «Темеркень Иштван» у Торньошу, сентянску Ґимназию за талантованих школярох зоз домом «Боляи» и Общи шпиталь Сента – обєкти чийо обновйованє, отримованє и опреманє финансоване и софинансоване зоз средствами з покраїнского буджету.
Предсидателька Ґойкович визначела же приоритет роботи Покраїнскей влади то вибудов нового дому за школярох Ґимназиї ─ школи за окремни таланти, у хторей ше уча дзеци зоз цалей Войводини.
«Роби ше о винїмково велькей инвестициї и предложиме же би ю вєдно реализовали Покраїнска влада и Влада Републики Сербиї. Тот проєкт значни за заєднїцу, же би дзеци хтори винїмково талантовани остали у своєй держави и прето треба же бизме им обезпечели исти условия яки ше им понука у иножемстве», виявела предсидателька Ґойкович и додала же обезпечена будовательна дозвола за початок роботох.
Вона здогадла на тото же Покраїнска влада у авґусту видвоєла средства за наглу санацию закрица школи у Торньошу и визначела же нєшка догварене же би ресорни секретарият потримал и поставянє новей подлоги у сали за физичне воспитанє.
До Общого шпиталю у Сенти, як наведла предсидателька Покраїнскей влади, по тераз уложени значни средства, а под час нєшкайшей нащиви и схадзки зоз руководством Општини бешедоване и о вибудови нового будинку пулмолоґиї.
Предсидатель Скупштини АП Войводини Балинт Югас визначел важносц тих инфраструктурних проєктох за гражданох Сенти, алє и за ширше подруче и подзековал предсидательки Покраїнскей влади Маї Ґойкович и ресорним секретаром, хтори потримали потерашнї проєкти и хтори буду партнере у реализациї будуцих.
«Попри реконструкциї закрица Основней школи у Торньошу, барз добра вистка же ше после длугшого часу закончує проєкт вибудови будинку з окремнима змистами за талатнованих школярох «Боляи», хтори пофришко будзе пущени до роботи. Маме и план за вибудов дому за школярох хтори будзе наменєни младим зоз цалей Войводини, цо допринєше же би Сента преросла до правого школского центру», гварел предсидатель Югас. Вон оценєл и же ше з вибудову пулмолоґийного оддзелєня у рамикох Общого шпиталю Сента, здравствени услуги подзвигнє на висши уровень и же ришованє питаня у вязи зоз здравйом гражданох вше на першим месце.
У роботней нащиви Сенти були и подпредсидателє Покраїнскей влади – покраїнски секретар за образованє, предписаня, управу и национални меншини – национални заєднїци Роберт Отот и покраїнски секретар за здравство Милан Попов.