Нови Сад, 20. марец – Предсидатель Скупштини АП Войводини Балинт Югас бешедовал нєшка зоз главну и одвичательну редакторку дньового информативного порталу «Варош РТВ» з Будапешту Диану Дюрич и представителями сербскей националней заєднїци у Мадярскей о предлужованю и унапредзованю информованя на сербским язику.
«Варош РТВ» длужей як пейц роки, прейґ интернет порталу и дружтвених мрежох, публикує висти и емитує радио и ТВ емисиї на сербским и мадярским язику, у хторих ше намага сербску меншинску заєднїцу у Мадярскей приблїжиц ґу актуалним дружтвеним и културним подїйом з Републики Сербиї, Мадярскей и цалого реґиона.
«Партнерски и приятельски одношеня медзи Сербию и Мадярску роками назадок напредую и приноша бенефити гражданом и єдней, и другей держави. Потримовка матичних державох националним заєднїцом у дияспори од окремней важносци и прешвечени сом же обидва держави предлужа з таку праксу хтора оможлївює очуванє националного идентитету, култури, традициї, информованя», визначел Югас и оценєл же информованє на мацеринским язику од виталней важносци и за Мадярох у Войводини, и за Сербох у Мадярскей, як и за шицки други национални заєднїци.
Вон можлївосц повторного запровадзованя сотруднїцтва «Варош РТВ» з Радио-телевизию Войводини, як и з другима медийскима установами, институциями и орґанизациями у АП Войводини оценєл як значну, бо вони можу допринєсц и помогнуц у розвою и збогацованю програми за сербску заєднїцу у Мадярскей.