Нови Сад, 6. марец – Предсидатель Скупштини АП Войводини Балинт Югас и предсидателька Покраїнскей влади Мая Ґойкович отримали нєшка порядну мешачну схадзку и бешедовали о заєднїцких активносцох двох институцийох у наступним периоду, як и о приоритетних чечуцих и будуцих проєктох и програмох.
Предсидателька Ґойкович и предсидатель Юхас бешедовали о значних проєктох у обласци здравства, хтори маю виталну значносц за гражданох Покраїни, як и о проєктох зоз обласци култури. Сумируюци нєдавно отриману заєднїцку роботну схадзку у Сеґедину зоз членами Еврореґионалней аґенциї за розвой Дунай-Криш-Мориш-Тиса (ДКТМ), вони визначели значносц пошвеценого приступу прейґгранїчного и медзиреґионалного сотруднїцтва и учасци у прейґгранїчних програмох и проєктох.
Ґойковичова и Югас розпатрели и динамику реализациї и важносци континуованого сотруднїцтва зоз шицкима локалнима самоуправами у АП Войводини, же би ше лєпше препознали найважнєйши потреби жительства у локалних штредкох.
Предсидателька Ґойкович и предсидатель Югас ище раз визначели значносц оможлївйованя нєзавадзаней роботи шицких институцийох як одлучуюцого условия за дальши економски и дружтвени проґрес и стабилносц жеми у цалосци.