Нови Сад/Сеґедин, 13. фебруар – Предсидателька покраїнскей влади Мая Ґойкович и предсидатель Скупштини Войводини Балинт Югас бешедовали нєшка у Сеґедину зоз членами Еврореґионалней аґенциї за розвой Дунай-Криш-Мориш-Тиса (ДКМТ) о розвойних потенциялох и актуалних питаньох у вязи зоз пригранїчну реґию.
На сходзе анализовани активносци ДКМТ и представени нови проєкти.
«Задовольни зме зоз нєшкайшим сходом, предсидатель Югас и я согласни же тото сотруднїцтво барз важне як и проєкти яки запровадзує ДКМТ. Важне прейсц зоз словох на дїла, и у тим контексту потребне принєсц акцийни план на хторим ше будзе базовац нашо будуце сотруднїцтво», виявела предсидателька Покраїнскей влади Мая Ґойкович.
Наймоцнєйши союзнїк Сербиї то Мадярска и наспак, нашо вязи нєрозтаргуюци, поручене зоз сходу.
Рижнородносц и численосц етнїчних заєднїцох хтори жию у жемох членох ДКМТ моцни фундамент и мост медзисобного сотруднїцтва, хтори сновани на здружованю и партнерству у обласцох привреди, образованя, уметносци, култури, спорту, заключене на сходзе.
Предсидатель Скупштини Войводини Балинт Югас виражел задовольство же реґионалне ДКМТ сотруднїцтво децениями
тирва през заєднїцки проєкти од яких хасен маю гражданє шицких трох державох.
«Дзекуюци тому сотруднїцтву вибудована проєктно-технїчна документация гайзибанскей драги медзи Суботицу и Сеґедином, а ДКМТ допринєсла и унапредзованю гранїчних преходох медзи Сербию и Мадярску. Шицко тото ма вельку значносц за гражданох зоз того подруча», поручел предсидатель Югас.
Учашнїки сходу здогадли и на два найактуалнєйши проєкти у рамикох реґионалного сотруднїцтва ДКМТ.
Проєкт «LIGHT BORDERS IN DKMT» ше финансує прейґ Интерреґ ИПА Програми прейґгранїчного сотруднїцтва Мадярска-Сербия 2021-2027. року у вкупней суми коло 240 тисячи евра, а циль идентификованє потребох инфраструктурного розвою и процедурох яки би олєгчали преход гранїци медзи Сербию и Мадярску.
Три стратеґийни проєкти уж одобрени, а то обновйованє закрица и розвой туристичного потенциялу Городскей хижи у Суботици, проєкт едукациї польопривреднїкох и моцнєнє сотруднїцтва у случаю позарядових ситуацийох у Войводини и у цалим пригранїчним подручу.
Проєкт «MAKE RIVER TISA GREAT AGAIN» у фази пририхтованя, а циль унапредзованє отримуюцого туризму рики Тиса.
Реґионалне сотруднїцтво Дунай-Криш-Мориш-Тиса основане 21. новембра 1997. року у Сеґедину з цильом потримовки и стимулованя сотруднїцтва локалних самоуправох, привреднїкох и гражданох у шицких обласцох хтори можу помогнуц у демократизациї, интеґрациї, дружтвеному и привредному розвою.
На роботним сходу присуствовали и подпредсидателє Жупанийскей ради Бач-Кишкун и Ради Чонґрад-Чанад, Корнел Мак и Залан Хаґ и директорка Еврореґионалней аґенциї за розвой Естер Ана Чокаши.