Нови Сад, 08. фебруар – Предсидатель Скупштини АП Войводини Балинт Югас приял нєшка предсидателя Народней скупштини Републики Сербскей др Ненада Стевандича хтори перши раз урядово нащивел покраїнски парламент.
Югас и Стевандич бешедовали о предлужованю длугорочного, традиционалного сотруднїцтва двох парламентох, як на уровню посланїцких ґрупох приятельствох, так и роботних целох скупштинох и фахових службох зоз цильом черанки искуствох, прикладох добрей пракси и заєднїцких активносцох.
Предсидатель Югас наглашел свойо прешвеченє же два парламенти и двоме предсидателє предлужа и преглїбя сотруднїцтво хторе ма моцни фундаменти, а хторе започали їх предходнїки хтори робели на отримованю институционалних вязох, алє и на отримованю вязох гражданох АП Войводини и Републики Сербскей.
«Исную и институционални рамики у форми подписаних протоколох о сотруднїцте на уровню парламентох, алє и фахових службох хтори нам даваю широки спектер можлївосцох же бизме зоз заєднїцку роботу допринєсли розвою и просперитету Войводини и Сербскей», здогаднул Югас и додал же АП Войводини, як и Републики Сербиї сотруднїцтво матичней держави зоз дияспору барз значне.
Предсидатель Стевандич подзековал предсидательови Югасови на привиту и окреме наглашел барз значну улогу бувшого предсидателя Скупштини АП Войводини Иштвана Пастора у запровадзованю и отримованя вязох двох парламентох. Визначуюци ясну намиру же ше тото сотруднїцтво предлужи, вон поволал предсидателя Югаса же би з делеґацию пошвидко нащивел Народну скупштину Републики Сербскей.
Делеґация Републики Сербскей пребува у нащиви Новому Саду з нагоди учасци на «Сайме родзеного краю – родзени край през привреду, туризем и културу» на Новосадским сайме, хтори орґанизує Покраїнски фонд за вибеженцох, розселєни особи и за сотруднїцтво зоз Сербами у реґионє.