Нови Сад, 20. децембер – Предсидатель Скупштини АП Войводини Балинт Югас присуствовал нєшка на шветочним означованю велького ювилею Мадяр со, 80. рочнїци виходзеня єдиних дньових новинох на мадярским язику у нашей жеми.
У присуству предсидателя Югаса, предсидательки Покраїнскей влади Маї Ґойкович, городоначалнїка Нового Саду Милана Дюрича и народного посланїка Балинта Пастора на початку шветочносци отворена нова конференцийна сала Дружтва за новинско-видавательну дїялносц Мадяр со, як и видвоєне оддзелєнє Предшколскей установи «Вацкор», хтора почина з роботу у Новим Садзе.
У шветочних бешедох пошвецених тому велькому ювилею, бешеднїки здогадли на длугоку и успишну традицию тих новинох, хтори маю нєвимерлїве значенє за мадярску националну заєднїцу у Войводини. Як наглашене, през децениї Мадяр со провадзел и провадзи шицки важни подїї и єден є зоз главних слупох очуваня националного идентитету мадярскей националней заєднїци.
Директорка Дружтва за новинско-видательну дїялносц Мадяр со Едвина Ердеди и о.д. главней редакторки Мадяр со Марта Варю подзековали шицким, поєдинцом и институцийом, хтори децениями творели тоти новини и помагали же би вони виходзели, помагали у модернизациї и у нових инвестицийних проєктох. 
З нагоди 80. рочнїци виходзеня, предсидательови Югасови, попри других, нєшка уручене и подзекованє Мадяр со за помоц и потримовку у його виходзеню, як и за доприношенє у витворйованю цильох и условийох за дальше напредованє.
На шветочносци присутвовали и предсидатель Националного совиту Мадярскей националней меншини Арпад Фремонд, амбасадор Мадярскей у Сербиї Йожеф Мадяр, як и числени други госци.