Нови Сад, 18. децембер – Предсидатель Скупштини АП Войводини Балинт Югас присуствал нєшка на промоциї пригодней поштанскей марки пошвеценей Мадяр со-у, хтора видата з нагоди велького ювилею, 80. рочнїци тих єдиних дньових новинох на мадярским язику у Сербиї.
Бешедуюци на шветочносци, на хторей означена и 67. рочнїца друкарнї Форум, предсидатель Югас подзековал подриємству Пошти Сербиї на длугорочним успишним партнерстве, як и шицким хтори участвовали у реализациї того барз важного проєкту.
«Пошта Сербиї у септембре прешлого року видала двоязичну марку на чесц мадярскому поетови Петефи Шандорови, цо по словох нашого покойного предсидателя Иштвана Пастора бул єден зоз круциялних доказох и символох покля зме сцигли у одношеньох почитованя, довирия и приятельства медзи Мадярску и Сербию. Лєм рок познєйше знова, з гордосцу и задовольством, нєшка представяме марку на чесц осем деценийох Мадяр со-а. Прешвечени сом же у цалим Карпатским реґионє анї єдна держава окрем Сербиї, на таки способ, нє указала припознанє єдней националней заєднїци и новином хтори виходза на єй мацеринским язику», гварел Югас.
Предсидатель Скупштини АП Войводини визначел же Мадяр Со глас и душа мадярскей заєднїци у Войводини, хтори од 1944. року каждодньово информує своїх читательох, а друкарня Форум уж 67 роки провадзи видаванє тих новинох и представя ґарант очуваня мадярскей писменосци и обстояня преси. 
«Заєднїцка история новинох и друкарнї моцни доказ же мадярска преса у Войводини нє лєм часц прешлосци, алє и нашей будучносци», гварел Югас.
Пригодну марку хтора илуструє дньово новини Мадяр Со дизайновала уметнїца Анамари Баняц. На шветочносци бешедовали и представнїк Пошти Сербиї Александар Белич, a о планох и посцигнутих резултатох бешедовали директорка Дружтва за новинско-видавательну дїялносц Мадяр со-а Едвина Ередеди и заменїца директора задлужена за друкарню Анґела Веґвари. На шветочносци присуствовал и подпредсидатель Покраїнскей влади и покраїнски секретар за образованє, предписаня, управу и национални заєднїци – национални меншини Роберт Отот.