Нови Сад – Предсидатель Скупштини АП Войводини Балинт Югас бешедовал нєшка у покраїнским парламенту зоз предсидательом Привредней комори Войводини (ПКВ) Владимиром Ґаком о активносцох з якима ше доприноши ґу унапредзеню войводянскей привреди и економскому росту.
Предсидатель Югас наглашел же Скупштина АП Войводини и Привредна комора Войводини пестую длугорочне партнерске одношенє и блїзко сотрудзую прейґ орґанизованя заєднїцких активносцох, як цо то Реґионални дїловни форум, хтори того року отримани по седми раз у сотруднїцтве зоз Скупштину европских реґийох и релевантнима покраїнскима институциями.
„Сотруднїцтво наших двох институцийох лоґичне и природне, бо маме исти циль, а то унапредзенє привреди и економиї АП Войводини, та самим тим и цалей Републики Сербиї. Тото цо Привредна комора Войводини роби уж 105 роки ма нєвимерлїву значносц, бо, заступаюци интереси привреднїкох и поднїмательох, умрежуюци их и повязуюци, орґанизуюци рижни едукациї, виглєдуюци тарґовище и даваюци информациї, представя нєвичерпне жридло потримовки“, гварел предсидатель Югас, додаваюци же тота институция вельки порушовач войводянскей привреди.
Предсидатель Привредней комори Войводини Владимир Ґак информовал предсидателя Югаса о найновших привредних рушаньох у Войводини, насампредз визначуюци же у чаше кед велї жеми стаґную або заоставаю, АП Войводина и Република Сербия зазначую значни економски рост, оценююци привредни и економски обставини у Републики Сербиї як стабилни.
Вон визначел же Привредна комора Войводини и надалєй будзе место дзе ше забудзе зазберовац привреднїкох и же з полним своїм капацитетом будзе и далєй робиц на унапредзеню їх знаньох и схопносцох, як и давац им полну потримовку при пренаходзеню потенциялних партнерох як у жеми, так и на иножемних тарґовищох.
Предсидатель Югас наглашел же Скупштина АП Войводини, як и потераз, будзе партнер на хторого Привредна комора Войводини може раховац у своєй роботи, а з цильом дальшого розвою нашей покраїни и привредного и економского просперитету.