Нови Сад, 3. децембер – Предсидатель Скупштини АП Войводини Балинт Югас приял нєшка амбасадорку Кральовини Шведскей у Републики Сербиї Шарлот Самелин зоз хтору бешедовал о економским и привредним сотруднїцтве, желєней транзициї и приблїжованю нашей жеми ґу Европскей униї.
Предсидатель Югас и амбасадорка Самелин виражели задовольство пре билатерални одношеня Сербиї и Шведскей хтори на винїмково високим уровню, як и пре факт же дипломатски одношеня двох жемох тирваю вецей як єден вик.
Предсидатель Югас визначел же АП Войводина барз заинтересована за моцнєнє економского сотруднїцтва зоз реґиями и инвеститорами у Шведскей и же у тим намаганю одлична подлога же тота жем на першим месце медзи скандинавскима жемами у вонкашньо-тарґовинскей черанки зоз Сербию.
«Прешвечени зме же нашо потенцияли у обласцох ИТ индустриї и польопривреди можу буц атрактивни за шведских инвеститорох. Тримам же викрок хтори зме направели у повязованю тих двох конарох вельки нє лєм за нашу реґию и державу, алє и за цалу Европу», гварел Югас, наводзаци приклади Институту БиоСенс, диґиталней фарми у Бачкей Тополї и диґиталного валалу у Мокрину.
Вон подзековал Шведскей, як и Шведскей аґенциї за медзинародни розвой и сотруднїцтво, на потерашнєй помоци и роботи як на промоциї социялного диялоґу и родней ровноправносци, так и на всеоблапней потримовки европским интеґрацийом Републики Сербиї.
Югас и амбасадорка Самелин бешедовали о моделох сотруднїцтва у обласци желєней транзициї у нашей жеми, як и о
важносци уключованя ширшей дружтвеней заєднїци до того процесу.
Амбасадорка Самелин визначела же Шведска, як и други нордийски жеми, предлужи промововац свойо искуства цо вязани за отримуюци розвой, желєни и мудри городи и додала же обачлїве намаганє Републики Сербиї укладац до едукациї и дзвиганя еколоґийних стандардох.
Вони бешедовали и о специфичносцох Войводини як вецейнационалного и мултикултуралного штредку, як и о квалитетним законским рамику Републики Сербиї у обласци защити правох националних заєднїцох.