Нови Сад, 27. новембер – Подпредсидатель Скупштини Автономней покраїни Войводини Борис Новакович, присуствовал нєшка на медзинародней науково-фаховей конференциї под назву: „Людски права у фокусу“, хтора отримана у будинку Ректорату Универзитету у Новим Садзе.
Конференцию орґанизовал Покраїнски защитнїк гражданох – омбудсман у сотруднїцтве з Правним факултетом у Краґуєвцу и Правним факултетом у Новим Садзе, з цильом позберац шицких релевантних учашнїкох зоз академских, наукововиглєдовацких и других обласцох, як и представительох релевантних институцийох и орґанизацийох хтори ше занїмаю з людскима правами.
Привитуюци сход, Борис Новакович, подпредсидатель Скупштини АП Войводини, наглашел же защита людских правох нє лєм правна обовязка, алє морална одвичательносц каждого поєдинца и институциї.
„Автономна покраїна Войводина приклад як ше през медзисобне почитованє и заєднїцтво може будовац мости медзи рижнима културами, етничнїма и вирскима заєднїцами.
Як дружтво, заєднїцки, мушиме обезпечиц каждому чловекови жиц достоїнствено, у шлєбоди и мире, бо лєм так можеме будовац лєпше дружтво за шицких нас“, поручел Новакович.
„Нєшка зме ше позберали же бизме шицких нас ище раз здогадли на фундаменталну правду: „Лєм чловек може помогнуц другому чловекови. Лєм чловек може дац моц другому кед вон у нєволї.” Тоти слова Шандора Мараия глїбоко виражую сущносц людских правох, хтори и одвичательносц каждого з нас, каждого поєдинца и колективу.
Як подпредсидатель Скупштини Автономней покраїни Войводини, глїбоко сом прешвечени же наша одвичательносц стаємно робиц на унапредзеню положеня людских правох и шлєбодох на шицких уровньох дружтва, а окреме на локалним и покраїнским.
Войводина, як мултиетнїчна и мултинационална заєднїца, представя простор дзе людски права фундамет нашей коеґзистенциї. У тим смислу, нє шмеме дошлєбодзиц же би гоч хто бул забути або занєдзбани, алє же би шицки гражданє нашей покраїни, без огляду на етнїчну, вирску або гоч яку припадносц, мали исти шанси витвориц свойо права.
Значносц людских правох нє лєм у їх защити, алє и у їх активним промовованю. Як институциї, ми ту же бизме обезпечели каждей особи, без огляду на тото дзе жиє, мац приступ ґу образованю, здравственей защити, защити од насилства, з єднакима шансами за обезпечованє роботи и ґу шицким другим правом хтори фундамент достоїнственого живота“, гварел подпредсидатель Скупштини Автономней покраїни Войводини, Борис Новакович.
На нєшкайшей медзинародней фаховей конференциї под назву „Людски права у фокусу“, бешедовали и Томислав Жиґманов, министер за людски и меншински права и дружтвени диялоґ у Влади Републики Сербиї, доц. др Драґана Чорич, Покраїнска защитнїца гражданох — омбудсманка, др Драґутин Аврамович, рядови професор Правного факултету у Новим Садзе и проф. др Єлена Вучкович, рядова професорка Правного факултету Краґуєвцу.
У мено Покраїнскей влади, на конференциї присуствовал Роберт Отот, подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци