Нови Сад, 28. новембер – Предсидатель Скупштини АП Войводини Балинт Югас отворел нєшка 55. Медзинародни саям туризму, хтори ше од 28. по 30. новембер отримує на Новосадским сайме.
Привитуюци представнїкох вецей як 300 подприємствох, институцийох и орґанизацийох хтори участвую на тогорочним сайме, предсидатель Югас визначел вельку значносц тей традиционалней манифестациї у промоциї туризму и повязованю партнерох зоз тей и зродних индустрийох.
Виражуюци вельке задовольство прето же Мадярска жем партнер тогорочного сайму, предсидатель Югас наглашел же ше стратеґийни приятельски и партнерски одношеня двох жемох спатраю и у тим же число туристох з тей жеми за лєм єден рок три раз векше. Вон подзековал Влади Мадярскей, компетентному министерству и Аґенциї ХЕПА же препознали значносц того сайму и одволали ше на поволанку будз партнер тей важней манифестациї за туризем.
«АП Войводину нащивели дакус вецей як 20 тисячи мадярски туристи, а у 2023. року их було коло 63 тисячи. У перших
дзевец мешацох того року Сербию нащивели 48.082 туристи з Мадярскей», прецизовал Югас. По його словох, Новосадски саям уж 55 роки указує же розуми стратеґийну важносц туризму за привредни, социялни, образовни и културни розвой, як и тото же туристични потенцияли Войводини – европски потенцияли.
«Нашо богате историйне, културне и природне богатство превозиходзи гранїци єдней держави и култури а глїбоки историйни, политични, економски и язични вязи то тото цо нас повязує з нашима приятелями у реґионє и у Европи», гварел Югас и оценєл же за нас Дунай бул и остал главна улїца Европи.
Предсидатель Югас наглашел же у 2023. року АП Войводину нащивели вецей як 700 тисячи туристи хтори мали скоро 2 милиони ноцованя и же у перших дзевец мешацох того року Войводина мала 2,7 проценти туристох вецей у одношеню на исти период прешлого року.
Предсидателька Покраїнскей влади Мая Ґойкович визначела у бешеди же Медзинародни саям туризму у Новим Садзе оддавно прероснул гранїци реґионалного и постал важне место збераня туристичних дїячох. Вона наглашела же винїмково драгоцине тото же тогорочна жем партнер Мадярска, з оглядом на факт же ше зазначує константни рост у обласци туризму и рижнородносци туристичного понукнуца. Кед слово о АП Войводини, Ґойковичова наведла же є окреме горда на розвой туризму у покраїни бо тот привредни конар вше мал винїмкови потенциял хтори нє бул достаточно вихасновани.
На отвераню сайму присустних привитали и амбасадор Мадярскей у Републики Сербиї Йожеф Мадяр, директор Новосадского сайму Никола Ловрич и член Городскей ради Городу Нового Саду за привреду Милорад Радоєвич.
По шветочним отвераню, предсидателє Скупштини и Покраїнскей влади, вєдно з амбасадором Мадярскей и директором Новосадского сайму нащивя штанди покраїнских институцийох, Туристичней орґанизациї Сербиї, як и штанди Чарней Гори и Мадярскей.