Нови Сад, 25. новембер – Делеґация Скупштини АП Войводини присуствовала нєшка у Покраїнскей влади на означованю 106. рочнїци отримованя Велькей народней скупштини и Одлуки о присоєдинєню Войводини Кральовини Сербиї.
На шветочносци присуствовали предсидатель Скупштини АП Войводини Балинт Югас, подпредсидателє Дамир Зобеница, Александра Малетич, Неманя Завишич и Борис Новакович и ґенерална секретарка Сандра Стойкович.
Присутних привитала предсидателька Покраїнскей влади Мая Ґойкович, хтора з тей нагоди уручела и найвисше припознанє АП Войводини – Награду «Михайло Пупин», як и покраїнски припознаня тогорочним добитнїком у обласцох привреди, култури, образованя, спорту и ровноправносци полох.
Добитнїк Награди «Михайло Пупин» то проф. др Александар Андєлкович, доктор наукох у обласци машинского инженєрства, хтори на шветочносци бешедовал у мено тогорочних лауреатох и подзековал Покраїнскей влади на припознаню и поручел же то будзе спонукнуце за його дальшу роботу.
Добитнїца покраїнского припознаня у обласци спорту «Момчило Тапавица» то Борислава Перич Ранкович, сербска столнотенисерка и параоломпийка. Хронїчар и публициста Душан Деянац добитнїк покраїнского припознаня у обласци култури «Ференц Фехер». Припознанє у обласци ровноправносци полох «Милица Томич» достала Светлана Маркович, снователь Здруженя женох «Свилен конац – Обровец». Професор сербского язика и литератури у Ґимназиї и економскей школи «Йован Йованович Змай» з Оджаку Сладяна Бодироґа добитнїца покраїнского припознаня у обласци образованя «Дьордє Натошевич». Добитнїк покраїнского припознаня у обласци привреди «Лазар Дундєрски» то компания «Шидпроєкт» ДОО Шид.