Нови Сад, 19. новембер – Предсидатель Скупштини АП Войводини Балинт Югас участвовал нєшка на Форуме „eMobility 4 Sustainability“, хтори орґанизовали Факултет технїчних наукох Универзитету у Новим Садзе, EV Days саям и конференция и Привредна комора Войводини, у сотруднїцтве зоз мадярску компанию IKARUS.
Привитуюци учашнїкох Форуму, хтори пошвецени можлївосцом хаснованя електроенерґиї як погонского горива за путнїцки превозки алє и за автобуси, предсидатель Югас визначел значносц иновацийох и науково-технолоґийних одкрицох за унапредзенє квалитету каждодньового живота и роботи.
„Тей пошвеценосци науковей заєднїци шведочиме и нєшка на Факултету технїчних наукох Универзитету у Новим Садзе. На политичним уровню, тей пошвеценосци зме шведочели и прешли тидзень, кед на Другей схадзки Совиту за стратеґийне сотруднїцтво Сербиї и Мадярскей подписани Меморандум о розуменю медзи Министерством науки, технолоґийного розвою и иновацийох Сербиї и Министерством култури и иновацийох Мадярскей“, визначел Югас и наглашел же у чаше ґлобалного климатского зогриваня тема уводзеня електричних автобусох до явного превоженя барз значна и актуална.
Предсидатель Югас указал на тото же ше медзи цилями Плану розвою АП Войводини 2023-2030. находзи и унапредзенє квалитету явного превоженя, медзи иншим и з уводзеньом електричних автобусох.
„Електромобилносц меня шицко, нє лєм социялне и еколоґийне окруженє, нє лєм ступень заґадзеня и галайку – електромобилносц меня и наш способ роздумованя и розуменя швета и дава нам надїю же можеме вибудовац отримуюцу и чисту будучносц“, визначел предсидатель Югас.
На отвераню Форуму, на хторим представени електрични миди-бус IK80e и електрични соло-автобус IK120e мадярскей компаниї IKARUS, бешедовали и амбасадор Мадярскей у Републики Сербиї Йожеф Мадяр, декан ФТН проф. др Борис Думнич, предсидатель Привредней комори Войводини Владимир Ґак и подпредсидатель компаниї IKARUS Тамаш Бенкоч.