Нови Сад, 15. новембер - Предсидатель Скупштини АП Войводини Балинт Югас присуствовал нєшка на Универзитету у Новим Садзе на Другим сербско-мадярским ректорским форуму хтори орґанизує Мадярска ректорска конференция (MRK) вєдно зоз Конференцию универзитетох Сербиї (KONUS).
Привитуюци присутних, предсидатель Югас виражел вельке задовольство же ше Други сербско-мадярски ректорски форум отримує у Новим Садзе, як и же вчера у Суботици почала дводньова Мадярска ректорска конференция з присуством представнїкох наших универзитетох, оценююци же то ище єден доказ же АП Войводина место стретнуца и сотруднїцтва, як у обласци науки и образованя, так и у велїх других обласцох.
Бешедуюци о образовних институцийох у нашей покраїни предсидатель Югас гварел же у АП Войводини окреме значне же постої можлївосц покладаня приємних испитох на мацеринским язику и наглашел же ше на язикох националних меншинох приємни испити покладаю на штирох високих школох фаховних студийох, як и на 11 од 14 факултетох чий снователь АП Войводина. Вон додал и же у найвекшим чишлє тоту можлївосц хасную студенти мадярскей националней заєднїци. 
«У членох 17. и 18. Контракту о приятельских одношеньох и сотруднїцтва у обласци стратеґийного партнерства хтори подписали влади Републики Сербиї и Мадярскей, наглашує ше же обидва боки буду стимуловац директне сотруднїцтво медзи своїма образовнима и културнима институциями, потримовац оспособйованє интелектуалцох и преглїбйованє активних одношеньох у обласци високого образованя и фахового усовершованя, як и отримовац рядови диялоґ пре двобочне стимулованє мобилносци студентох», здогаднул предсидатель Югас. Вон оценєл же Други сербско-мадярски ректорски форум як и вельке число заєднїцких проєктох наших универзитетох хтори ше финансую з ЕУ фондох, потвердзенє же точки єдного политичного документу мож реализовац у стварносци.
Бешедуюци о резултатох сотруднїцтва, предсидатель Югас визначел два видавательни подняца, Сербско-мадярски словнїк авторки др Миряни Бурзан и др Аґнеш Кациба у виданю видавательней хижи Форум 2016. року, як и Мадярско-сербски фразеолоґийни словнїк зоз 2024. року, хторому автор професорка Едит Андрич.
У роботи Другого сербско-мадярского ректорского форуму участвовали и ректор Универзитету у Новим Садзе проф. др Деян Мадич, ректор Универзитету у Беоґрадзе и предсидатель KONUS-у проф. др Владан Дьокич, предсидатель Мадярскей ректорскей конференциї проф. др Ласло Борхи и други представнїки Конференциї универзитетох Сербиї и Мадярскей ректорскей конференциї.