Нови Сад, 24. октобер - Предсидатель Скупштини АП Войводини Балинт Югас участвовал нєшка на конференциї проєкту «Унапредзенє заєднїцкого присподобйованя климатским пременком и екстремним хвильовим обставином през розвой платформи за интеґралне управянє з водами – ADAPTisa», хтори ше финансує у рамикох Interreg VI-A IPA програми Мадярска – Сербия 2021-2027.
Водзаци партнер на проєкту то Факултет технїчних наукох у Новим Садзе, а други партнере на проєкту Фонд «Европски роботи» АПВ то Управа за водопривреду за подруче Долня Тиса (Мадярска), Универзитет у Сеґедину (Мадярска) и Явне комуналне подриємство «Води Войводини» Нови Сад.
Предсидатель Югас визначел же нєшкайша конференция потвердзенє же АП Войводина и мадярски жупаниї пред коло двома децениями добре розумели наиходзаци пременки и почали заєднїцки пририхтовац ИПА проєкти прейґгранїчного сотруднїцтва. Вон наглашел же и у шветлє ґлобалного зочованя з проблемом климатских пременкох, проєкт интеґрованого управяня з водами на рики Тиси значни и з наукового и технолоґийного и безпечносного аспекту з оглядом же Тиса чече през териториї 12 єдинкох локалних самоуправох у Войводини, дзе єст коло 170.000 жительох, цо представя коло 9% войводянскей популациї.
«Войводина оддавна будує витернїци сотруднїцтва з прейґгранїчнима партнерами. У остатнїх 17 рокох, озбильна, одвичательна и професионална заєднїцка робота тимох з мадярских жупанийох и войводянских општинох на проєктох чия реализация звичайно тирва коло 6 роки нє могла резултовац иншак лєм як успих», гварел Югас и додал же тот проєкт предлуженє инженєрских подняцох хтори ше реализує у остатнїх 150 рокох, од кеди ше роби на вибудови системи гацох за одбрану од вилївох, бо ше Тиса вилївала каждей яри длуж 100 километери свойого побрежя. 
«Политични, економски, науково и културни вязи наших двох заєднїцох глїбоко зачувани у дружтвеней историї и здогадованю. Вони ше отримали и попри пременкох политичних обставинох бо людзох хтори будовали и обновйовали тоти вязи крашела иста характеристика хтора краши и нєшкайших креаторох заєднїцких проєктох прейґгранїчного сотруднїцтва. То витирвалосц», поручел предсидатель Югас.
Покраїнски секретар за високе образованє и наукововиглєдовацку дїялносц проф. др Бранко Маркоски визначел же, на взаємне задовольство, проєкт «ADAPTisa» под час двох рокох злучи науковцох з универзитету у Новим Садзе и Сеґедину, як и подприємства хтори управяю з водами у Сербиї и Мадярскей.
«Нашо два держави уж децениями маю розвити одношеня засновани на медзисобним довирию, приятельстве и заєднїцкей визиї напредованя, у шицких сеґментох живота и роботи. Одличне сотруднїцтво двох державох ше прелїва и на наукововиглєдовацку роботу и сотруднїцтво институцийох», гварел проф. др Маркоски и додал же прейґгранїчне сотруднїцтво хторе пестуєме нє лєм формални рамик, алє жива и динамична вяза хтора дава числени розвойни можлївосци. З оцену же прейґ заєднїцких проєктох як цо то «АDAPTise» мож витвориц конкретни резултати хтори доприноша академским заєднїцом, алє и цалому дружтву, проф. др Марковски наглашел дальшу потримовку Покраїнскей влади и секретарияту на чиїм є чолє.
О значносци того проєкту бешедовали и директор Науково-технолоґийного парку Нови Сад проф. др Срдян Колакович и програмска менаджерка Заєднїцкого секретарияту програми Interreg IPA Мадярска – Сербия, Оливера Танацкович.
Вкупни буджет проєкту виноши 1.418.020,16 евра, од чого 85% донация Европскей униї, а то сума 1.205.317,13 евра. Главни циль проєкту ADAPTisa то розвиванє заєднїцкей платформи за интеґроване управянє з водами на рики Тиси зоз хаснованьом иновативних диґиталних алатох за предвидзованє и планованє, зоз чим ше унапредзує комуникацию и сотруднїцтво медзи заинтересованима боками за управянє з водами и катастрофами з присподобйованьом екстремним климатским пременком.